BAKI, AzerVoice
Türkiyə Milli Kəşfiyyat Təşkilatının (MİT) direktoru İbrahim
Kalın HƏMAS Siyasi Bürosunun sədr müavini Halil Hayye ilə telefon
danışığı aparıb.
AzerVoice xəbər verir ki, görüşdə
ABŞ-ın xüsusi nümayəndəsi Steve Witkoffun vasitəçiliyi ilə HƏMAS-a
təqdim olunan son təkliflər çərçivəsində aparılan atəşkəs
danışıqlarında əldə olunan irəliləyişlər müzakirə olunub.
İbrahim Kalın, Türkiyənin Qəzzada baş verən humanitar böhranın
aradan qaldırılması və yardımın çatdırılması üçün göstərdiyi
səyləri vurğulayıb.
Tərəflər, əsir mübadiləsi və humanitar yardım keçidlərinin dərhal təmin olunmasının, eləcə də daimi atəşkəsə nail olmaq üçün atılacaq addımların vacibliyini müzakirə ediblər.
Telefon danışığında ABŞ, Qətər və Misirin vasitəçiliyi ilə
danışıqların davam etdirilməsinin önəmi qeyd olunub. Həmçinin
Qəzzadakı humanitar faciənin sonlandırılması üçün beynəlxalq
ictimaiyyətin İsrailə təzyiq göstərməsinin vacibliyi xüsusi
vurğulanıb.
Qeyd edək ki,
İsrailin Qəzzaya qarşı apardığı hərbi əməliyyatlar nəticəsində
minlərlə insan həlak olub, on minlərlə insan yaralanıb və bölgədə
ağır humanitar böhran yaşanır. Türkiyə bu prosesdə həm atəşkəsin
təmin olunması, həm də bölgəyə humanitar yardımların çatdırılması
üçün diplomatik fəaliyyətini davam etdirir.
