BAKI, AzerVoice
TPAO Xəzərdə təbii qaz tərəfdaşlığına qoşulub.
AzerVoice xəbər verir ki, Türkiyə Neft Şirkəti (TPAO) Xəzər dənizinin Azərbaycana məxsus sektorunda yerləşən Şafak-Asiman təbii qaz yatağında 30 faiz payla yeni tərəfdaş olub.
Bu məqsədlə Bakıda TPAO, SOCAR və BP arasında tərəfdaşlıq sazişi imzalanıb. Mərasimdə TPAO-nun baş direktoru Əhməd Türkoğlu, BP-nin Azərbaycan, Gürcüstan və Türkiyə üzrə regional prezidenti Qari Cons və SOCAR-ın prezidenti Rövşən Necef iştirak ediblər.
Sazişə əsasən, SOCAR və BP öz paylarının hər birindən 15 faiz olmaqla ümumilikdə 30 faizi TPAO-ya verib. Beləliklə, TPAO yataqda 30 faiz payla tərəfdaş olub.
SOCAR prezidenti Rövşən Necef bu əməkdaşlığın Azərbaycanın dəniz enerji ehtiyatlarının inkişafında regional tərəfdaşlığın əhəmiyyətini göstərdiyini qeyd edib. BP rəsmisi Qari Cons isə bildirib ki, bu tərəfdaşlıq Şafak-Asiman yatağında kəşfiyyat və qiymətləndirmə işlərini sürətləndirəcək.
TPAO rəhbəri Əhməd Türkoğlu isə bu addımın enerji təhlükəsizliyi və dayanıqlı gələcək üçün mühüm olduğunu vurğulayıb. O qeyd edib ki, tərəfdaşlıq həm məşğulluq, həm də Cənub Qaz Dəhlizi üçün strateji əhəmiyyət daşıyır.
Qeyd edək ki, Şafak-Asiman yatağı Bakıdan təxminən 125 kilometr cənub-şərqdə, 650–800 metr dərinlikdə yerləşir.
