BAKI, AzerVoice
Türkiyənin xarici işlər naziri Hakan Fidan İstanbulda Rusiya prezidenti Vladimir Putin, Ukrayna prezidenti Volodimir Zelenski və ABŞ prezidenti Donald Trampın iştirak edəcəyi mümkün liderlər görüşünə hazır olduqlarını qeyd edib.
AzerVoice xəbər verir ki, bu barədə Fidan TRT-yə verdiyi açıqlamada bildirib.
"Liderlər zirvəsi üçün hazırıq. Putin, Tramp və Zelenskinin eyni vaxtda bir araya gəlməsi çox önəmlidir. Bu üç liderin də eyni zamanda güvəndiyi tək şəxs Rəcəb Tayyib Ərdoğandır. Bu yalnız iki ölkənin müharibəsi deyil, qlobal yayılma riski olan bir müharibədir. Prezidentimiz ilk gündən etibarən həm bölgə liderlərinə, həm də tərəflərin liderlərinə dəfələrlə çağırış edib" - deyə, Nazir vurğulayıb.
"Rusya-Ukrayna sülhü üçün nə edə biləcəyimizi düşündük və bu istiqamətdə təşəbbüslərimiz oldu. İlk gündən etibarən sülh üçün səylərimiz davam edir. Ötən gün baş tutan görüşdə tərəflərlə liderlər zirvəsi mövzusunu da müzakirə etdik. İstanbulda keçirilən görüşdə tərəflər bir çox məsələdə razılığa gəldi. Gözləntimiz odur ki, növbəti tur da olacaq. Çünki hər iki tərəf bir araya gəlməyin faydalı olduğunu gördü" - deyə, o əlavə edib.
