BAKI, AzerVoice
ABŞ Prezidenti Donald Tramp hələ də Ukraynadakı böhranın həlli ilə bağlı irəliləyişə müsbət yanaşır.
AzerVoice xəbər verir ki, bu barədə Ağ Evin mətbuat katibi Kerolayn Livitt gündəlik brifinqdə verdiyi açıqlamada bildirib.
“Mən bu barədə (Ukrayna böhranının həlli haqqında – red.) bu səhər onunla danışdım. O, bu böhranın həlli ilə bağlı irəliləyişə müsbət yanaşır” – deyə, o bildirib.
“Bildiyiniz kimi, dünən İstanbulda Rusiya və Ukrayna arasında birbaşa danışıqlar baş tutdu. Bu, prezident Tramp tərəfindən dəstəkləndi, o, bir neçə həftə əvvəl hər iki ölkənin liderləri ilə telefon danışığı aparmışdı. Hər kəsə xatırlatmaq istəyirəm ki, cəmi dörd ay ərzində nə qədər irəliləmişik. Keçən il bu vaxtlarda Rusiya ilə Ukraynanın birbaşa danışıqlar aparması təsəvvür belə olunmazdı. Yalnız prezident Trampın əzmkarlığı və qətiyyəti sayəsində müharibənin dayandırılması üçün bu ölkələr dünən görüşə bildilər” - deyə, o əlavə edib.
Jurnalistlər Livittdən ABŞ Konqresində Senatda Rusiyaya qarşı sanksiyaların sərtləşdirilməsini nəzərdə tutan qanun layihəsini Trampın dəstəkləyib-dəstəkləmədiyini də soruşublar. Livitt cavabında deyib: “O, bu aləti ehtiyac yaranarsa istifadə etmək üçün arsenalında saxlayır.”
