BAKI, AzerVoice
Liverpool klubunun fransalı müdafiəçisi İbrahima Konate yay transfer dönəmində Səudiyyə Ərəbistanından aldığı sərfəli təklifi rədd edib.
AzerVoice xəbər verir ki, 26 yaşlı futbolçu karyerasını Avropada davam etdirmək niyyətində olduğunu bildirərək, UEFA Çempionlar Liqasında oynamağı əsas prioritet hesab etdiyini açıqlayıb.
Səudiyyə Ərəbistanının tanınmış klublarından biri Konatenin nümayəndələri ilə qeyri-rəsmi əlaqə saxlayaraq yay transferi üçün imkanları dəyərləndirib. Lakin futbolçu açıq şəkildə Avropada qalmaq istəyini ifadə etdiyindən, ərəb klubu alternativ namizədlərə yönəlməli olub.
Hazırda Konate Liverpoolla olan müqaviləsinin son 12 ayına daxil olub. Klub onunla yeni müqavilə imzalamağa çalışsa da, danışıqlarda irəliləyiş əldə olunmayıb.
Bu vəziyyət Real Madridin diqqətindən yayınmayıb. Madrid klubu Konateni müdafiə xəttinə gələcək gücləndirmə kimi görür. İspaniya təmsilçisi futbolçunu 2026-cı ildə azad agent kimi heyətinə qatmaq istəyir.
Hələlik Real Madrid tərəfindən rəsmi təklif təqdim olunmayıb. Lakin mətbuat iddia edir ki, klub Liverpoolun tələb etdiyi qiyməti test edə bilər. İngiltərə klubu futbolçu üçün 50 milyon avro (təxminən 43 milyon funt sterlinq) tələb edir. Real Madrid isə bu məbləğin təxminən yarısını – 20-25 milyon avro aralığında (17-21,5 milyon funt) təklif etməyə hazırdır..
