BAKI, AzerVoice, Zeynəb Raminqızı
İsveçin paytaxtı Stokholmda yüzlərlə insan İsrailin Qəzzadakı aclıq siyasətinə və jurnalistləri hədəf almasına etiraz edib.
AzerVoice xəbər verir ki, çox sayda vətəndaş cəmiyyəti təşkilatının çağırışı ilə Odenplan Meydanında toplanan yüzlərlə insan, 25 avqustda İsrailin Qəzza zolağının cənubundakı Xan Yunusda yerləşən Nasser Xəstəxanasına etdiyi hücumlar nəticəsində həlak olan jurnalistlərin simvolik tabutlarını və fotoşəkillərini daşıyıb.
Etirazçılar əllərində “Fələstində uşaqlar və mülki insanlar aclıqdan ölür”, “Jurnalistika cinayət deyil”, “Jurnalistlər hədəf deyil” və “Xarici İşlər Nazirliyi jurnalistlərin öldürülməsinə son qoyun” yazılı plakatlar qaldırıb.
Qəzza zolağında ağır şərait və saysız-hesabsız təhlükələr altında çalışan jurnalistlər, həyatlarını riskə ataraq, baş verənləri işıqlandırmağa və həqiqəti çatdırmağa davam edirlər. Onlar təkcə bombardman və partlayış təhlükəsi ilə üzləşmirlər, həm də elektrik enerjisinin tam kəsilməsi, günəş panellərinin İsrail tərəfindən hədəfə alınaraq məhv edilməsi, internetin uzun müddət kəsilməsi və digər maneələrlə qarşı-qarşıyadırlar.
Müharibə başlayandan bəri Qəzzada 246 jurnalist həlak olub, çox sayda media nümayəndəsi isə yaralanıb. Onların arasında əllərini və ayaqlarını itirənlər, eləcə də iflic təhlükəsi ilə üz-üzə qalanlar var. “Beyt əl-Sahafa” qurumunun rəhbəri Hikmət Yusif bildirib ki, İsrail ordusu jurnalistləri məqsədli şəkildə hədəfə alır: “Bu sadəcə təsadüf deyil, Qəzzada jurnalistlər həqiqəti çatdırdıqları üçün qəsdən vurulurlar”.
Ciddi maneələr və psixoloji təzyiq
Jurnalistlər yalnız müharibənin gətirdiyi təhlükələrlə deyil, həm də internet və rabitənin kəsilməsi, nəqliyyatın çətinliyi, avadanlıq çatışmazlığı ilə mübarizə aparırlar. Müxbir Əməl əl-Vadiyə deyib: “İsrail interneti və rabitəni qəsdən kəsir ki, dünyaya Qəzzada baş verənlər çatmasın. Biz bəzən hadisə yerinə belə çata bilmirik”. O, həmçinin həmkarı, müxbir Məryəm Əbu Dəqqənin İsrailin Xən Yunisdəki Nəsir Tibb Kompleksinə hücumu zamanı qətlə yetirildiyini xatırladıb.
Ötən həftə həmin tibb mərkəzinə hücum zamanı 22 nəfər həyatını itirib, onların arasında 5 jurnalist də olub. Əvvəlcə ilk zərbə endirilib, daha sonra isə hadisə yerinə toplaşan jurnalistlər və tibbi heyət ikinci hücumun hədəfi olublar.
“Məqsəd – həqiqəti gizlətməkdir”
Müxbir Əşrəf Əbu Əmrə vurğulayıb ki, İsrailin əsas məqsədi “həqiqəti gizlətmək və görüntüləri susdurmaqdır”: “Oktyabrın 7-dən bəri İsrail jurnalistlərin varlığından narahatdır. Çünki biz onların cinayətlərini sənədləşdiririk və dünyaya göstəririk”. O qeyd edib ki, beynəlxalq media qurumlarının yerli jurnalistlərlə əməkdaşlığı İsrailin qəzəbinə səbəb olub və bu da hədəfli hücumların artmasına gətirib çıxarıb.
Dünyada ən qanlı müharibə müxbirlər üçün Qəzzada yaşanır
Mətbuat təşkilatlarının hesabatlarına görə, Qəzzadakı müharibə müasir dövrdə jurnalistlər üçün ən qanlı münaqişə sayılır. Müqayisə üçün: İkinci Dünya Müharibəsi dövründə 69, Vyetnam müharibəsində 63, Koreya müharibəsində isə 17 jurnalist həlak olmuşdu. Ukrayna-Rusiya müharibəsində indiyədək 17 media nümayəndəsi həyatını itirib. Ancaq Qəzzada cəmi iki il ərzində 250-yə yaxın jurnalistin öldürülməsi bu rəqəmləri dəfələrlə üstələyir.
Qurumlar və insan haqları təşkilatları baş verənləri hərbi cinayət kimi qiymətləndirir və jurnalistlərin müdafiəsi üçün təcili beynəlxalq tədbirlərin görülməsinə çağırırlar. Yaralı jurnalistlərin müalicə üçün təcili olaraq Qəzza xaricinə çıxarılması tələb olunur.