BAKI, AzerVoice, Zeynəb Raminqızı
Qəzzadakı Şifa Xəstəxanasının müdiri Məhəmməd Əbu Silmiyye, İsrailin hücumlarını və blokadasını gücləndirdiyi Qəzzada son üç həftə ərzində təxminən min nəfər böyüklərin qida çatışmazlığı səbəbindən xəstəxanaya yerləşdirildiyini bildirib.
AzerVoice xəbər verir ki, Əbu Silmiyyə bu vəziyyətin İsrailin davam edən aclıq siyasəti ilə birbaşa əlaqəli olduğunu vurğulayıb.
"Aclıq səbəbilə xəstəxanalara müraciət edən xəstələrin və yaralıların əksəriyyəti ağır qida çatışmazlığından əziyyət çəkir"- deyə o qeyd edib.
Əbu Silmiyyə xəstəxanaların xəstələr və yaralılarla dolu olduğunu, İsrailin intensiv bombardmanının vəziyyəti daha da ağırlaşdırdığını bildirib.
Qəzza şəhərinə son hücumlar çoxsaylı ölüm və yaralanmalara səbəb olub və İsrail bu şəhəri “təhlükəli müharibə zonası” elan edib.
Əbu Silmiyyə Qəzzada ciddi humanitar və sağlamlıq vəziyyətinə də toxunaraq, şimal və cənub bölgələrindən qərb bölgələrinə kütləvi köçün olduğunu və bu ərazilərin məcburi köçkünlərlə dolu olduğunu bildirib.
O, izah edib ki, köçkünlərin immun sistemləri zəifdir və bu, yoluxucu xəstəliklərin yayılmasına şərait yaradır. O, son vaxtlar yayılan virusun qızdırma, baş ağrısı, ishal kimi əlamətlərə səbəb olduğunu, immun sistemi zəif olanlarda inkubasiya dövrünün iki həftədən çox ola biləcəyini vurğulayıb.
Qeyd edək ki, Qəzzada Səhiyyə Nazirliyi, son 24 saatda 10 nəfərin qida çatışmazlığı və aclıqdan öldüyünü, aclıqdan ölənlərin ümumi sayının 124-ü uşaq olmaqla 332-yə çatdığını açıqlayıb.
