BAKI, AzerVoice, Fərid Mikayılov
İtaliya nəhəngi Milan transfer pəncərəsinin son günlərində Barselonanın müdafiəçisi Andreas Kristenseni heyətinə qatmaq istəyir.
AzerVoice xəbər verir ki, Kataloniya klubunun baş məşqçisi Hansi Flik danimarkalı oyunçunun ayrılmasına isti baxmır.
Milan ilk turda Kremonezeyə 1:2 hesabı ilə uduzduqdan sonra müdafiəni gücləndirməyi prioritet elan edib. 2022-ci ildə Çelsidən azad transferlə Barselonaya qoşulan Kristensen hazırda komanda ilə müqaviləsinin son ilini yaşayır. Klub maliyyə baxımından oyunçu satışına açıq olsa da, Flik sıx oyun təqvimi səbəbindən əlavə itkiyə qarşı çıxır.
Milan Kristensenlə yanaşı Mançester Sitinin müdafiəçisi Manuel Akanjini də izləyir. Lakin danimarkalı oyunçunun La Liqa və Premyer Liqa təcrübəsi Milan üçün onu xüsusi dəyərli hədəfə çevirir.
Kristensen son günlər xəstəlik səbəbindən məşqləri buraxsa da, hazırda sağlamdır və Flikin seçimləri arasındadır. O, son turda Levante üzərində 3:2 hesablı qələbədə ehtiyatdan meydana daxil olaraq komandasının dönüşündə mühüm rol oynayıb.
Transfer pəncərəsi sentyabrın 1-də bağlanacaq. Bu müddət ərzində Milan danışıqları irəlilətməyə çalışacaq. Barselona isə maliyyə zərurəti ilə idman baxışları arasında çətin seçim etməli olacaq.
