BAKI, AzerVoice, Zeynəb Raminqızı
İsrail ordusunun gün ərzində Qəzza zolağının çoxsaylı bölgələrində mülki əhalini hədəf alan hücumları nəticəsində bu gün 58 fələstinli həyatını itirib.
AzerVoice xəbər verir ki, xəstəxana mənbələri və şahidlərin bildirdiyinə görə, İsrailin Qəzza şəhərinə planlı işğalının bir hissəsi olaraq Qəzza zolağının şimal, mərkəzi və cənub hissələrində çoxsaylı bölgələrdə evlərə, mülki insanların toplaşdığı yerlərə və yardım istəyən insanlara hücumlar həyata keçirilib.
İsrail ordusu Qəzzanın şimalında Əl-Kərəmə məhəlləsində bir evi hədəfə alıb. Hücum zamanı bir ana və uşağı olan iki nəfər həlak olub, iki nəfər isə yaralanıb.
İsrailin Qəzza şəhərinin qərbində məcburi köçkün fələstinlilərin yerləşdiyi çadıra və ictimai çörək zavoduna təşkil etdiyi hücumda altısı uşaq olmaqla ümumilikdə 12 nəfər həlak olub.
Eyni zamanda Rimal, Cibəliyyə, Kerame, Tuffah, Zeytun və Sabra məhəllələrində də müxtəlif hücumlar həyata keçirib və onlarla insan həyatını itirib.
Deyr əl-Bəlahın girişindəki Səlahəddin küçəsini hədəf alan İsrailin bombardmanı nəticəsində bir fələstinli həlak olub.
Netzarim dəhlizi yaxınlığında insanların kömək gözlədiyi zaman 5 nəfər ölüb, çoxlu sayda insan yaralanıb.
İsrailin Qəzza zolağının cənubundakı Rəfah və Xan Yunisdə yardım qruplarına təşkil etdiyi iki ayrı hücumda 5 nəfər, Asda bölgəsində isə bir qadın həlak olub.
Qeyd edək ki, 7 oktyabr 2023-cü ildən bəri İsrailin ABŞ-ın dəstəyi ilə Qəzzaya təşkil etdiyi hücumlarda 63,025 fələstinli həyatını itirib, 159,490 nəfər yaralanıb, 9,000-dən çox insan isə itkin düşüb. Əksəriyyəti qadın və uşaq olan qurbanlar arasında aclıq səbəbindən həlak olanların sayı da 121-i uşaq olmaqla 322 nəfərə çatıb.
Fələstin hökuməti və insan haqları təşkilatları İsrailin tibb işçilərini, xəstəxanaları və təcili yardım maşınlarını hədəf aldığını, bunun səhiyyə sisteminə qəsdən ziyan vurmaq məqsədi daşıdığını bildirir. Beynəlxalq ictimaiyyətə humanitar dəhlizlərin açılması və Qəzzaya yardımın çatdırılması üçün təcili tədbir görülməsi çağırışı edilib.