BAKI, AzerVoice, Fərid Mikayılov

Fənərbağçanın baş məşqçisi Joze Mourinyo, Real Madrid-in ehtiyat qapıçısı Andriy Lunini heyətinə qatmaq istəyir.

AzerVoice xəbər verir ki, portuqaliyalı mütəxəssis Dominik Livakoviçin İstanbulda gözləntiləri doğrultmaması səbəbindən yeni qapıçı axtarışına çıxıb.

Real Madriddə Tibo Kurtuanın kölgəsində qalan 25 yaşlı ukraynalı qapıçı uzunmüddətli perspektivdə kral klubunda qalmaq istəsə də, Mourinyo ona əsas heyət qapıçısı statusu vəd edərək İstanbul klubuna transfer etməyə çalışır.

Fənərbağça artıq Real Madridə Luninlə bağlı rəsmi məktub göndərib. Məktubda qapıçının müqavilə şərtləri və transfer imkanları barədə məlumat tələb olunub. Mourinyo transfer pəncərəsinin bağlanmasına sayılı günlər qalmış Madrid klubunun mövqeyini yoxlamaqda israrlıdır.

Luninin transferində təkcə Fənərbağça yox, Galatasaray da maraqlı tərəf kimi göstərilir. “Sarı-qırmızılılar” uzun illərdir qapısını qoruyan Fernando Musleraya alternativ axtarır. Onların əsas hədəfləri Ederson, Yann Sommer və Coştin Lammers olsa da, Lunin də ehtimal variantlar sırasında saxlanılır.

Madrid klubu isə Luninlə yolları ayırmaqda tərəddüd edir. Rəhbərlik onu Kurtuanın mümkün zədələnmələri üçün “sığorta” hesab edir.

Ukraynalının ayrılması halında, Real Madrid transfer pəncərəsinin son günlərində yeni qapıçı axtarmaq məcburiyyətində qala bilər ki, bu da riskli addım kimi qiymətləndirilir.