BAKI, AzerVoice
Argentina millisinin və İnter Mayami klubunun ulduzu Lionel Messinin Barselonaya dönüşü artıq real görünmür.
AzerVoice xəbər verir ki, 38 yaşlı hücumçunun 2026-cı il Dünya Çempionatından sonra futbolla vidalaşacağı ehtimal olunur.
Hazırda Messi ABŞ-ın MLS çempionatında çıxış edən İnter Mayami klubunda oynayır. Klubla müqaviləsi 2023-cü ilin yayından qüvvədədir və futbolçunun istəsə, onu 12 ay daha uzatmaq imkanı var.
Son günlərdə Messinin Səudiyyə Ərəbistanına – əbədi rəqibi Kriştiano Ronaldonun oynadığı Əl-Nəsr və ya digər klublardan birinə keçəcəyi ilə bağlı iddialar irəli sürülüb. Lakin ulduz futbolçu gələcək planları ilə bağlı hələlik rəsmi açıqlama verməyib.
Fransa millisinin sabiq yarımmüdafiəçisi və keçmiş Barselona futbolçusu Emmanuel Petit məsələyə münasibət bildirərək, Messinin artıq Avropa səviyyəsində oynamaq üçün fiziki imkanlarının yetərli olmadığını qeyd edib.
“Messinin Barselonaya qayıdışı ilə bağlı söz-söhbətlər var, amma Lamine Yamal kimi bir gənc istedad ehtiyatda oturacaq deyil. Messi 10 nömrə mövqeyində oynaya bilər, amma hamımız bilirik ki, o artıq qaçmır. Barselona iki yarımmüdafiəçi ilə mərkəzi necə idarə edə bilər? Messi Barselonaya qayıtmayacaq, bu mümkünsüzdür”- deyə o bildirib.
Petit əlavə edib ki, Messi ABŞ-da xüsusi münasibət görür və bu komfortu tərk edib Avropaya qayıtması çətin olacaq. Onun fikrincə, 2026-cı il Dünya Çempionatından sonra Messi karyerasını başa vuracaq.
