BAKI, AzerVoice, Fərid Mikayılov
Real Madridin yarımmüdafiəçisi Dani Sebalyos yay transfer pəncərəsində komandadan ayrılacağına dair işarə verib.
AzerVoice xəbər verir ki, La Liqada Real Oviedoya qarşı keçirilən oyunda son dəqiqələrdə meydana daxil olan Sebalyon, sosial şəbəkə hesabında “Son rəqs” (“Last dance”) yazılı paylaşım edib.
Bu, 29 yaşlı futbolçunun gələcəkdə yeni kluba keçid edəcəyi ehtimallarını gücləndirib.
Komandada baş məşqçi vəzifəsinə Xabi Alonsonun gətirilməsindən sonra Sebalyosun mövqeyi zəifləyib. O, Jude Bellingham və Eduardo Kamavinga kimi zədəli oyunçulara baxmayaraq, yarımmüdafiədə seçim sırasının arxasında qalır.
Alonso əsasən Aurelien Tçuameni, Federiko Valverde və mərkəzə çəkdiyi Arda Gülərə üstünlük verir.
Son iki oyunda da Sebalyos yalnız son dəqiqələrdə meydana buraxılıb, Oviedo qarşılaşmasının 86-cı, Osasuna matçının isə 90-cı dəqiqəsində.
Futbolçu mövsüm öncəsi Real Madriddə qalmaq və əsas heyətdə yer uğrunda mübarizə aparmaq istədiyini bildirib. Onun məqsədi həm də İspaniya millisinin baş məşqçisi Luis de la Fuentenin diqqətini çəkərək 2026 Dünya Çempionatına qatılmaq idi. Lakin müntəzəm oyun praktikası qazanmadığı halda, bu arzusunun gerçəkləşməsi çətin görünür.
Real Madrid Sebalyosu saxlamaqda maraqlı olsa da, klub 15–20 milyon avro aralığında gələcək təklifləri dəyərləndirməyə hazırdır. Oyunçu daha əvvəl Betis ilə də adı hallansa da, hələlik bu istiqamətdə konkret irəliləyiş qeydə alınmayıb.
