BAKI, AzerVoice
Arsenal yay transfer dönəmində Bavariyanın ulduz futbolçusu Leroy Saneni heyətinə qatmağı planlaşdırır.
AzerVoice xəbər verir ki, klubun baş məşqçisi Mikel Arteta, Mançester Sitidə birgə çalışdığı alman cinah oyunçusunu yenidən komandasında görmək niyyətindədir.
Sanenin Bavariya ilə olan müqaviləsi bu ilin 30 iyun tarixində başa çatır. Klub onunla yeni müqavilə imzalamaqda çətinlik çəkdiyindən, futbolçunun transferi getdikcə daha real görünür.
Arsenal isə yeni mövsüm üçün sol cinahda güclənmək istəyir. Mövcud seçimlərindən razı olmayan Arteta, Saneni komandaya əlavə etməklə cinah hücumuna yeni nəfəs gətirmək niyyətindədir.
Arsenalın digər transfer hədəfi Atletik Bilbaoda çıxış edən Niko Uilyams olsa da, onun yüksək maaş tələbləri transferi çətinləşdirə bilər.
Leroy Saneyə yalnız Arsenal deyil, Avropa Liqasının son qalibi Tottenhem Hotspur da maraq göstərir. Baş məşqçi Ance Postekoqlu Çempionlar Liqasında uğur üçün heyətini gücləndirmək istəyir və Saneni ideal seçim kimi görür.