BAKI, AzerVoice
Son 24 saat ərzində İsrail ordusunun Qəzza zolağına endirdiyi zərbələr nəticəsində azı 78 fələstinli həlak olub.
AzerVoice xəbər verir ki, bu barədə Qətərin "Al Jazeera" telekanalı məlumat yayıb.
Həmçinin bildirilib ki, son həftələr ərzində Qəzzada 700-dən çox fələstinlinin ərzaq yardımı almağa çalışarkən öldürülüb. Qəzza Səhiyyə Nazirliyinin məlumatına əsasən, İsrail hakimiyyətinin ABŞ-ın iştirakı ilə yaratdığı Qəzzaya Humanitar Fondu (GHF) vasitəsilə yardım məntəqələrində yardım almağa gələn 743 nəfər həlak olub, 4 800-dən çoxu isə yaralanıb.
Nazirliyin ümumi statistikasına görə, İsrail və Qəzza arasında baş verən müharibədə indiyədək 57 300-dən çox insan həlak olub, demək olar ki, 136 min nəfər isə yaralanıb.
Qeyd edək ki, mayın 18-də İsrail ordusu “Gideonun Arabaları” adlı genişmiqyaslı quru əməliyyatı çərçivəsində Qəzza zolağının şimal və cənub bölgələrində hərbi əməliyyatlara başladığını elan edib. Əməliyyatın məqsədi HƏMAS-ın tamamilə məhv edilməsi və anklavda saxlanılan bütün israilli girovların azad olunmasıdır. İsrailin Baş naziri Benyamin Netanyahunun sözlərinə görə, əməliyyat nəticəsində ordunun Qəzza zolağının bütün ərazisinə nəzarəti ələ keçirməsi planlaşdırılır.
