BAKI, AzerVoice
İngiltərənin ikinci dərəcəli futbol liqası olan Çempionşipdə mübarizə aparan Lids Yunayted və Börnli, mövsümün başa çatmasına iki tur qalmış İngiltərə Premyer Liqasına yüksəlməyə nail olublar.
AzerVoice xəbər verir ki, 44-cü tur qarşılaşmalarında Lids Yunayted öz meydanında Stok Sitini darmadağın edərək 6:0 hesabı ilə qələbə qazanıb.
Börnli isə səfərdə Şefild Yunayted üzərində 2:1-lik əzmkar qələbə əldə edib. Bu nəticələrdən sonra hər iki komanda Premyer Liqaya yüksəlmək üçün kifayət qədər xal toplayıb.
Turnir cədvəlində Lids Yunayted 94 xalla liderdir, Börnli isə eyni xalla ikinci sırada qərarlaşıb. Onların ardınca gələn Şefild Yunayted 86 xalla üçüncü pillədədir və qalan iki turda xal fərqini aradan qaldırması mümkün deyil. Bu isə Lids və Börnlinin Premyer Liqaya vəsiqəsini rəsmiləşdirir.
Qeyd edək ki, Lids Yunayted, 2022/2023 mövsümünün sonunda Premyer Liqanı tərk edib. Ardıcıl uğursuz nəticələr və rəhbərlik dəyişikliklərindən sonra klub, bu mövsüm güclü heyət və daha balanslı oyunla qayıdışını təmin edbi. Lids, xüsusilə son aylarda ardıcıl qələbələrlə turnir cədvəlinin zirvəsində mövqeyini möhkəmləndirib.
Börnli isə 2022-ci ildə Premyer Liqanı tərk etdikdən sonra struktur dəyişikliyi və menecer dəyişiklikləri ilə diqqət çəkib. Komanda bu mövsüm daha stabil oyun nümayiş etdirərək yenidən elita liqasına dönməyi bacarıb. Xüsusilə hücum xəttində və standart vəziyyətlərdə effektiv çıxış edən Börnli, mövsümün əvvəlindən Premyer Liqaya qayıdacağına dair siqnallar verib.
