BAKI,AzerVoice, ƏHMƏD SALİH HƏLƏBİ Xüsusi olaraq AzerVoice üçün
Dəryə Biennale Fondu, 2025-ci ildə keçiriləcək ikinci İslam Sənətləri Biennalesinin açılışını elan edib. Tədbir Ciddə şəhərində, Kral Əbdüləziz Beynəlxalq Hava Limanının qərb zəvvar zalında baş tutacaq və "Və onların arasında" başlığı altında keçiriləcəkdir.
Bu mövzu, Uca Allahın endirdiyi ayələrdən ilham alınaraq keçirilib
“Biz göyü, yeri və onlar arasında olanları oyun-oyuncaq yaratmadıq. (Kainat əbəs yerə deyil, Allahın qüdrətinin təcəssümü kimi yaradılmışdır. Buna görə də insanlar yalnız onun xaliqi Allaha ibadət etməlidirlər)” (Ənbiya, 16)
“O, göylərin və yerin, onların arasında olan hər şeyin Rəbbidir! Yalnız Ona ibadət et və Onun ibadətinə səbrli ol! Heç (Allahın özündən başqa) Ona bənzərini (Onun adını daşıyan başqa birisini) görmüsənmi? (Müşriklər öz bütlərinə tanrı, ilahi desələr də, heç zaman onlara Allah adını verməzlər).” (Məryəm, 65)
Beynəlxalq Səviyyədə İştirak
Biennalenin ikinci buraxılışı, yerli və beynəlxalq qurumların daha geniş iştirakına şahidlik edir. Tədbirdə Tunis, Daşkənd, Timbuktu və Yoqyakarta kimi şəhərlərdən İslam sənətləri sahəsində ixtisaslaşmış dünyanın ən tanınmış institutlarının kolleksiyalarına yer verilmişdir.
Bundan əlavə, sərgidə Luvr Muzeyi (Paris), Viktoriya və Albert Muzeyi (London), İslam Sənəti Muzeyi (Doha), Timbuktuda yerləşən Əhməd Baba İnstitutu (Mali), İstanbulda fəaliyyət göstərən Türk Əlyazmaları İnstitutu kimi məşhur beynəlxalq mədəniyyət və sənət qurumlarının eksponatları nümayiş etdiriləcək.
Beynəlxalq səviyyədə tanınmış institutlarla yanaşı, Səudiyyə Ərəbistanından Kral Əbdüləziz Mədəniyyət Mərkəzi - İthra (Zəhrən), Kral Əbdüləziz Vəqf Kitabxanası (Mədinə), Kral Fahd Milli Kitabxanası (Riyad) kimi mühüm mədəniyyət ocaqları da sərgiyə töhfə verəcək.
Sərgidə həmçinin Səudiyyə Ərəbistanı, Körfəz ölkələri və dünyanın müxtəlif bölgələrindən 30-dan çox müasir sənətçinin əsərləri nümayiş etdiriləcək.
Mükəmməl Sərgi Dizaynı və Tematik Bölmələr
Böyük mədəniyyət sərgiləri geniş və peşəkar şəkildə təşkil olunmalıdır. Bu baxımdan, biennale yeddi unikal bölməyə ayrılıb.Bu bölmələr 100 min kvadrat metrlik bir sahədə yerləşən sərgi zallarında və açıq məkanlarda təqdim ediləcək. Biennalenin ümumi dizaynı beynəlxalq memarlıq şirkəti OMA tərəfindən hazırlanmışdır.
500-dən Çox Tarixi və Müasir Sənət Əsəri
Biennaledə Səudiyyə Ərəbistanı, Fələstin, Misir, Oman, Qətər, Tunis, Küveyt, Özbəkistan, Danimarka, Fransa, Yunanıstan, İndoneziya, İtaliya, Mali, Portuqaliya, İspaniya, Türkiyə, Böyük Britaniya, İordaniya və ABŞ daxil olmaqla 30-dan çox beynəlxalq qurumun iştirakı ilə 500-dən çox tarixi və müasir İslam sənət əsəri sərgilənəcək.
Bu tədbir İslam tarixinin nadir eksponatlarını və müasir sənət nümunələrini bir dam altında birləşdirəcək və ziyarətçilərə bənzərsiz incəsənət və mədəniyyət təcrübəsi təqdim edəcək.
Kəbə Örtüyü və Tarixi Əşyalar
Biennale, Kral Əbdüləziz tərəfindən 1346-cı ildə hazırladılan Kəbə Örtüyü Kompleksinin yüzilliyi ilə eyni vaxta təsadüf edir. Sərgidə Kəbə örtüyü tam şəkildə nümayiş etdiriləcək və onun tarixi mərhələlərdən keçərək necə inkişaf etdiyi, eləcə də sənətkarlıq işləri və yazı bəzəkləri ilə bağlı geniş məlumat təqdim ediləcək.
Bundan əlavə, sərgidə Kəbənin qədim açarı da daxil olmaqla, nadir tarixi İslam əsərləri ziyarətçilərə təqdim olunacaq.
Mədəniyyət və Təhsil Proqramları
Biennale çərçivəsində müxtəlif mədəni və elmi tədbirlər keçiriləcək. Mühazirələr, seminarlar, ictimai təşəbbüslər və panellər tədbirin əsas hissələrindəndir.
Bundan əlavə, biennale “Məktəbdən sonra Biennale” və “İşdən sonra Biennale” adlı xüsusi təşəbbüslərlə həftə ərzində interaktiv praktiki seminarlar təşkil edəcək. Bu proqramlar yaradıcılığı və incəsənətə baxışı inkişaf etdirmək üçün nəzərdə tutulmuşdur.
İslam Sənətləri Biennalesi, mədəniyyətin, incəsənətin və elmin keçmişdən bu günə daşınmasında mühüm bir mərhələ olaraq qalacaqdır.
