BAKI, AzerVoice, Orxan Qədirzadə

Rusiyanın Anapa şəhərindəki texnikumlardan birində tələbə odlu silahdan atəş açıb.

AzerVoice xəbər verir ki, Krasnodar diyarı Daxili İşlər İdarəsinin məlumatına görə, hadisə təhsil müəssisəsinin foyesində baş verib.

Bölgə qubernatoru Veniamin Kondratyevin verdiyi məlumata görə, hücum nəticəsində bir nəfər — binaya girişi bağlayaraq cinayətkarın içəri keçməsinə mane olan mühafizəçi həlak olub. Atışma zamanı daha iki nəfər orta dərəcəli xəsarətlər alıb, yaralananlardan birinin tələbə olduğu bildirilir. Zərərçəkənlərin dəqiq sayı dəqiqləşdirilir.

İlkin məlumatlara görə, hücumu həmin texnikumun 17 yaşlı tələbəsi İlya O. törədib. O, qohumuna məxsus ov tüfəngini oğurlayaraq onlarla patronla birlikdə təhsil müəssisəsinə gəlib. Şahidlərin bildirdiyinə görə, gənc oğlan binada ən azı beş atəş açıb və hadisə yerinə gələn "Rosqvardiya" əməkdaşları tərəfindən saxlanılıb. Hadisədən iki gün əvvəl İlya O. sosial şəbəkə hesablarında əvvəllər oxşar cinayətlər törətmiş şəxslərin foto və videolarını paylaşaraq anons veribmiş.

Qeyd edək ki, bu, ilin əvvəlindən bəri Rusiyada yeniyetmələrin təhsil müəssisələrinə etdiyi artıq beşinci silahlı hücumdur. Yanvar və fevral aylarında Nijnekamsk, Kodinsk, Ufa və Krasnoyarsk şəhərlərində də bıçaq, çəkic və pnevmatik silahlarla bənzər hadisələr qeydə alınıb. Hüquq-mühafizə orqanları hadisənin motivlərini araşdırır, faktla bağlı cinayət işi açılıb.