BAKI, AzerVoice
HƏMAS ilə İsrail arasında Qəzza zolağında münaqişənin həlli ilə bağlı aparılan dolayı danışıqlar dalana dirənib.
AzerVoice xəbər verir ki, bu barədə Qətərin Baş naziri və eyni zamanda xarici işlər naziri Şeyx Məhəmməd bin Əbdürrəhman Əl-Tani məlumat verib.
“Münaqişə ilə bağlı kreativ həll yolları axtarmağa çalışırıq, lakin hələ heç biri nəticə verməyib. Hətta təklif etdik ki, əgər HƏMAS-ı İsrail üçün məqbul mərhələli plana razı salmağı bacarsaq, BMT Təhlükəsizlik Şurasının nəzarəti ilə münaqişənin dayandırılması məqsədilə məhdud müddətli danışıqlar prosesi başlansın. İsrail bu təklifi rədd etdi” – deyə, Qətərin baş naziri bildirib.
Əl-Tani qeyd edib ki, Dohada keçirilən danışıqlarda vəziyyət elə formalaşıb ki, İsrail yalnız Qəzzada girov saxlanılanların azadlığına yönəlmiş razılaşma istədiyi halda, HƏMAS tam atəşkəs və müharibənin sonlandırılmasında israr edir.
“Düşünürəm ki, danışıqlar dalana dirənib” – deyə, Qətərin baş naziri vurğulayıb.
Xatırladaq ki, mayın 12-də Qəzza zolağındakı fələstinli qruplaşmalar ABŞ vətəndaşlığı olan israilli hərbçi İdan Aleksandrı azad ediblər. HƏMAS onun azad olunması ilə bağlı verdiyi açıqlamada hərtərəfli və daimi atəşkəsin əldə olunması məqsədilə danışıqların bərpasına hazır olduqlarını bildirmişdi. Həmin gün İsrailin baş naziri Binyamin Netanyahu ABŞ prezidentinin xüsusi nümayəndəsi Stiven Uitkoffla görüşdən sonra İsrail nümayəndə heyətini Qətərə göndərmək barədə göstəriş vermişdi.
Lakin Qətər baş naziri bildirib ki, Dohada keçirilən son məsləhətləşmələr tərəflərin mövqelərinin yaxınlaşmasına səbəb olmayıb. Myın 22-də Misirin “Əl-Qahira əl-İxbaria” telekanalı isə İsrailin danışıqlar üçün Dohada olan nümayəndə heyətini geri çağırdığını açıqlayıb.