BAKI,AzerVoice

İslam dini təmizlik və gigiyenaya böyük önəm verir. Quranda və hədislərdə müsəlmanların natəmizlikdən uzaq durması, bədəni təmiz saxlaması, dəstəmaz və qüslə riayət etməsi xüsusi vurğulanır. Allah təalə çirkdən və nəcasətdən təmizlənənləri sevdiyini bildirir, Peyğəmbərimiz ﷺ isə xüsusilə cümə günü qüsl alınmasını tövsiyə etmişdir. Həmçinin misvakdan istifadə, qoltuqaltı və qasıq tüklərinin təmizlənməsi, gözəl qoxu istifadə etmək kimi əməllər də sünnə sayılır.

Bədən tüklərinə dair dini hökmlər üç qismə ayrılır

1. Təmizlənməsi tövsiyə edilən tüklər

Qoltuqaltı və qasıq tükləri bu qrupa daxildir. Peyğəmbərimiz ﷺ buyurmuşdur:

“Fitrətdən beş şeydir: dırnaqların kəsilməsi, bığın qısaldılması, övrət nahiyəsinin qırxılması, qoltuqaltı tüklərin təmizlənməsi və sünnət olunmaq.”

2. Qadağan olunanlar

Quranda və Sünnədə haram buyurulan hallara qadınların qaş aldırması misal göstərilir. Rəsulullah ﷺ bu əməli edənlərə və etdirənlərə lənət etmişdir.

3. Qadağan və ya əmr edilməyən, yəni hökmü olmayan tüklər

Sinə və bel tükləri bu kateqoriyaya daxildir. Bu məsələdə heç bir dini mətn (nass) olmadığından, hökm mübahdır - yəni kəsmək də olar, saxlamaq da. Burada əsas şərt odur ki, hərəkət günaha, fəsada və ya pis niyyətə səbəb olmasın.

Nə vaxt kəsmək məqbul, nə vaxt uyğun deyil?

Əgər sinə və bel tükləri gigiyenik narahatlıq yaradırsa - qaşınma, tərləmə, pis qoxu - kəsməkdə heç bir problem yoxdur. Əgər yaşam tərzi və ailədaxili narazılıqlara, evlilik münasibətlərində soyumağa səbəb olursa, kəsmək məsləhətdir.

Lakin tükləri homoseksuallara bənzəmək və ya əxlaqsızlıq məqsədi ilə qırxmaq dini baxımdan yolverilməzdir. Rəsulullah ﷺ qadınlara bənzəməyə çalışan kişiləri və kişilərə bənzəməyə çalışan qadınları lənətləmişdir.

Alimlərə görə:

Hənəfi məzhəbində sinə və bel tüklərini kəsmək ədəbdən kənar sayılır, lakin qadağan deyil.

Maliki məzhəbində isə tam şəkildə mübahdır.

İslamda kişilərin sinə və bel tüklərini təmizləməsi qadağan deyil. Əsas şərt gigiyena, niyyət və zərər faktorlarının nəzərə alınmasıdır. Əgər tüklər əziyyət verirsə və ya şəxsi və ailə həyatında narahatlıq yaradırsa, onları kəsmək tamamilə caizdir.