BAKI, AzerVoice

ABŞ Maliyyə Nazirliyinin yüksək səviyyəli rəsmisi Con Hirli bildirib ki, Vaşinqton Livanda yaranmış yeni şəraitdən istifadə edərək İranın “Hizbullah”a maliyyə dəstəyini dayandırmaq və təşkilatı silahı yerə qoymağa məcbur etmək istəyir. AzerVoice xəbər verir ki, o bu barədə İstanbulda “Reuters”ə müsahibəsində danışıb.

Hirlinin sözlərinə görə, ağır iqtisadi sanksiyalara baxmayaraq, Tehran 2024-cü il ərzində “Hizbullah”a təxminən 1 milyard dollar ötürə bilib. ABŞ hesab edir ki, məhz bu maliyyə dəstəyi təşkilatın silahlı imkanlarını qoruyub saxlamağa imkan yaradır.
“Livanda indi nadir bir fürsət var. Əgər İranın pul axınını kəsib ‘Hizbullah’ı silahdan imtina etdirməyə nail olsaq, livanlılar öz ölkələrinə tam nəzarəti bərpa edə biləcək”, – deyə Hirli bildirib.

Vaşinqton ötən həftə “Hizbullah”ın maliyyələşdirilməsində iştirak edən iki şəxsə qarşı yeni sanksiyalar tətbiq edib. ABŞ rəsmisi həmçinin qeyd edib ki, İran iqtisadiyyatı inflyasiya və resessiya ilə üzləşsə də, Tehran hələ də milyonlarla dolları regiondakı silahlı qruplara yönəldir.

İsrail isə son aylarda Cənubi Livanda təşkilata aid obyektlərə hava zərbələri endirib və “Hizbullah”ın hərbi potensialını bərpa etməyə çalışdığını iddia edir. Livan hökuməti bütün qeyri-dövlət silahlı qrupların, o cümlədən “Hizbullah”ın silahsızlaşdırılacağını öhdəsinə götürsə də, təşkilat silahı tam təhvil verməyə razılaşmır.