BAKI, AzerVoice, Orxan Qədirzadə
İstanbul Cumhuriyyət Baş Prokurorluğu İsrailin Baş naziri Binyamin Netanyahu, müdafiə naziri İsrаel Katz, Nazir Tamara Ben Gvir, İsrail Silahlı Qüvvələrinin Baş Qərargah rəisi Eyal Zamir, İsrail Hərbi Dəniz Qüvvələri Komandanı David Saar Salama və digər yüksək rütbəli rəsmilər də daxil olmaqla ümumilikdə 37 nəfər barəsində “soyqırım” və “insanlığa qarşı cinayətlər” ittihamı ilə beynəlxalq axtarış qərarı çıxarıb.
AzerVoice xəbər verir ki, Baş Prokurorluğun rəsmi açıqlamasında, İsrailin Qəzzada sistematik şəkildə mülki əhaliyə qarşı hücumları, xəstəxanaların bombalanması, humanitar yardımların qarşısının alınması və yüzlərlə dinc sakinin qətlə yetirilməsi ilə bağlı mövcud dəlillər nəticəsində prosesin rəsmən başladıldığı bildirilib.
Açıqlamada, Qəzzada minlərlə qadın və uşağın öldürüldüyü, yaşayış məntəqələrinin məhv edildiyi, xəstəxanalara və tibbi heyətə hücumlar həyata keçirildiyi və humanitar yardımının qarşısının alındığı vurğulanıb.
Baş Prokurorluq, istintaqa 6 yaşlı Hind Recəb adlı uşağın 335 güllə ilə öldürülməsi, 17 oktyabr 2023-də Əl-Əhli Baptist Xəstəxanasının bombalanması (500 ölü), Türk-Fələstin Dostluq Xəstəxanasının vurulması, Səhiyyə müəssisələrinə davamlı hücumlar, Qəzzanın blokadası və humanitar yardımın qarşısının alınması, Beynəlxalq Sumud gəmilərinə qarşı hücum kimi hadisələri dəlil kimi göstərib.
İstanbul Baş Prokurorluğu “Beynəlxalq Sumud Filosunun” Qəzzəyə humanitar yardım apararkən beynəlxalq sularda İsrail donanması tərəfindən hücuma məruz qaldığını təsdiqləyib. Hücum zamanı saxlanılan şəxslərin İstanbul Tibb Qurumunda tibbi və psixoloji müayinədən keçirildiyi, ifadələrinin alındığı,rəsmi əməliyyatların Milli Kəşfiyyat Təşkilatı MİT və İstanbul Polis İdarəsi ilə koordinasiyalı aparıldığı bildirilir.
Baş Prokurorluğun açıqlamasına görə, adları çəkilən şəxslərin Türkiyəyə gəlməsi və ya beynəlxalq hüquqa uyğun olaraq Türkiyəyə təhvil verilməsi halında hüquqi proses dərhal icra ediləcək.
Bu qərar, Türkiyənin ilk dəfə olaraq İsrailin ali siyasi və hərbi rəhbərliyinə qarşı “soyqırım” ittihamı ilə beynəlxalq səviyyəli hüquqi addım atması kimi qiymətləndirilir.