BAKI, AzerVoice, Nailə Babazadə

ABŞ Prezidenti Donald Tramp ölkədəki seçkiləri "fırıldaqçılıq" adlandıraraq, mövcud sistemin bütün dünyada lağ mövzusuna çevrildiyini iddia edib. O, seçki prosesinin şəffaflığını təmin etmək üçün səsvermə zamanı seçici şəxsiyyət vəsiqəsinin və vətəndaşlıq sənədinin təqdim edilməsinin məcburi olmasını tələb edib.

AzerVoice xəbər verir ki, Tramp sosial media hesabında etdiyi paylaşımda ABŞ seçkilərinin "oğurlandığını" və təcili islahatlara ehtiyac olduğunu vurğulayıb.

"Ya bunları düzəldəcəyik, ya da artıq bir ölkəmiz olmayacaq". O, səsvermə və qeydiyyat proseslərində daha sərt qaydaları nəzərdə tutan "SAVE Act" qanun layihəsinə əməl olunmasını istəyib. Trampın təkliflərinə bütün seçicilər üçün məcburi şəxsiyyət vəsiqəsi, qeydiyyat zamanı ABŞ vətəndaşlığını sübut edən sənədin təqdimi və xüsusi hallar (xəstəlik, əlillik, hərbi xidmət) istisna olmaqla, poçt vasitəsilə səsvermənin ləğvi daxildir.

NBC News-a verdiyi müsahibədə Tramp bu tənzimləmələrin seçki sistemini qoruyacağını müdafiə edib. O, maraqlı bir iddia ilə çıxış edərək bildirib ki, Demokrat seçicilərin 82 faizi şəxsiyyət vəsiqəsi tələbini dəstəkləyir.

"Mən Demokrat siyasətçilərdən deyil, Demokrat seçicilərdən bəhs edirəm". Tramp həmçinin insanların fırıldaq edə bilmədiyi seçkilərə ehtiyac olduğunu və bu dəyişikliklərin hər iki partiya tərəfindən dəstəklənəcəyinə inandığını qeyd edib.

ABŞ-da seçicilər noyabrın 3-də aralıq seçkilər üçün sandıq başına gedəcək. Bu seçkilərdə Nümayəndələr Palatasının bütün 435 yeri və Senatdakı 100 yerdən 35-i müəyyənləşəcək. Trampın respublikaçıları seçki prosesini "milliləşdirməyə" və "nəzarəti ələ almağa" çağırması Demokratlar tərəfindən kəskin etirazla qarşılanıb.