BAKI,AzerVoice, Fərid Mikayılov

Fransa Prezidenti Emmanuel Makron Davosda keçirilən Dünya İqtisadi Forumu çərçivəsində çıxışı zamanı ABŞ Prezidenti Donald Trampın Qrenlandiya ilə bağlı təhdidlərinə sərt reaksiya verib.

AzerVoice xəbər verir ki, Makron bildirib ki, Avropa Vaşinqtonun təzyiqləri qarşısında geri çəkilməyəcək və “güclünün qanununu” passiv şəkildə qəbul etməyəcək.

Fransa lideri ABŞ-ın mümkün yüksək gömrük rüsumlarını “tamamilə qəbuledilməz” adlandıraraq, tariflərin davamlı şəkildə artırılmasının beynəlxalq ticarət sisteminə ciddi zərər vurduğunu vurğulayıb.

Makron qeyd edib ki, Avropa İttifaqı zərurət yaranacağı təqdirdə anti-məcburetmə mexanizmləri də daxil olmaqla, qarşılıqlı ticarət tədbirləri ilə cavab verə bilər. O, həmçinin Avropa liderlərinin Qrenlandiya məsələsi ilə bağlı cümə axşamı fövqəladə sammit keçirməsinin planlaşdırıldığını açıqlayıb.

Xatırladaq ki, ABŞ Prezidenti Donald Tramp 1 fevraldan etibarən yeni gömrük rüsumlarının tətbiq edilə biləcəyini bəyan edib və Fransa prezidenti ilə şəxsi yazışmalarını sosial mediada paylaşaraq iki lider arasında gərginliyi artırıb.

Makron Trampın açıqlamalarına münasibət bildirərkən, Fransanın sakit mövqeyini qoruyacağını, lakin milli maraqları və yerli istehsalçıları qətiyyətlə müdafiə edəcəyini bildirib.

Qeyd edək ki, Makron çıxış zamanı gün eynəyi taxıb. Yelisey Sarayından verilən məlumata görə, buna səbəb prezidentin gözündə damar partlaması olub.