BAKI,AzerVoice, Fərid Mikayılov
ABŞ Ədliyyə Nazirliyinin ötən cümə günü Jeffrey Epşteyn işi ilə bağlı milyonlarla yeni sənədi ictimaiyyətə açıqlamasından sonra qalmaqallı iddialar beynəlxalq gündəmi silkələməkdə davam edir. Gizliliyi ləğv edilən materiallarda bir sıra nüfuzlu siyasətçilər, iş adamları və kral ailələrinin üzvləri ilə yanaşı, ABŞ Prezidenti Donald Trampın da adının keçməsi diqqət çəkib.
AzerVoice xəbər verir ki, 3 milyondan çox sənəd, minlərlə video və yüz minlərlə fotoşəkildən ibarət materiallarda Epşteynin müxtəlif qlobal güc mərkəzləri ilə əlaqələri barədə ciddi iddialar yer alır.
Sənədlər arasında FTB-yə məxsus 2020-ci il tarixli məxfi məlumat qeydi xüsusilə diqqət çəkir.
Sənədlərdə FTB üçün çalışan məxfi mənbəyə (Confidential Human Source – CHS) istinadla qeyd olunur ki, Trampın ilk prezidentlik dövründə bəzi xarici və daxili təsir şəbəkələri ABŞ administrasiyasına nüfuz etməyə çalışıb. Middle East Eye nəşrinin yazdığına görə, həmin qeydlərdə Chabad-Lubavitch hərəkatının Tramp administrasiyası ilə sıx əlaqələr qurmağa çalışdığı iddia edilir.
Məxfi qeydlərdə Trampın kürəkəni Cared Kuşnerin də Chabad-Lubavitch çevrələrinə yaxın olduğu, Tramp administrasiyasında isə “real qərarverici fiqurlardan biri” kimi təqdim edildiyi bildirilir. Qeydlərdə Trampın ilk prezidentlik dövrünün “İsrailə yaxın təsir şəbəkələri tərəfindən formalaşdırıldığı” iddia olunur.
FTB sənədlərində ən çox səs-küy doğuran məqam isə Epşteynin İsrail kəşfiyyatı ilə mümkün əlaqələri ilə bağlıdır. Məxfi mənbəyə istinadla bildirilir ki, Epşteyn İsrailin sabiq baş naziri Ehud Barak ilə uzunmüddətli və yaxın münasibətlərə malik olub.
Sənədlərə əsasən, Epşteynin Barrakın ətrafında casusluq fəaliyyəti üçün hazırlandığı iddia edilir. Qeydlərdə Barrakın 2013–2017-ci illər arasında Epşteynin Nyu-Yorkdakı evini 30-dan çox dəfə ziyarət etdiyi də vurğulanır. Bu məlumatlar Epşteynin beynəlxalq siyasi və kəşfiyyat dairələri ilə əlaqələri barədə şübhələri daha da gücləndirib.
Açıqlanan materiallarda təkcə ABŞ və İsrail deyil, Avropa monarxiyalarına aid adlar da yer alır. Sənədlərdə Norveç vəliəhdi şahzadə Mette-Marit-in adı min dəfədən çox hallanır. Məlumata görə, o, 2011–2014-cü illər arasında Epşteynlə intensiv elektron yazışmalar aparıb.
Norveç mediasına açıqlama verən Mette-Marit, Epşteynlə əlaqə qurmasına görə “dərin peşmanlıq” hissi keçirdiyini bildirib.
Sənədlər həmçinin Böyük Britaniya şahzadəsi Endryu ilə Epşteyn arasındakı münasibətlərə dair əvvəllər məlum olmayan yazışmaları və fotoşəkilləri də üzə çıxarıb. Bu materiallarda şahzadə Endryunun Epşteynlə əlaqələrinin rəsmi titullarından imtina etdikdən sonra da davam etdiyi iddia olunur.
Xatırladaq ki, azyaşlılara qarşı cinsi istismar və insan alveri ittihamları ilə həbs olunan Jeffrey Epşteyn 2019-cu ildə Nyu-York həbsxanasında ölü tapılmış, rəsmi olaraq intihar etdiyi açıqlanmışdı. Lakin onun ölümü və əlaqələri illərdir qlobal mübahisələrə səbəb olur.
Yeni sənədlər Epşteyn qalmaqalının yalnız cinayət işi deyil, eyni zamanda beynəlxalq siyasi və kəşfiyyat əlaqələrini əhatə edən daha geniş bir şəbəkə olduğunu göstərir.