BAKI,AzerVoice, Fərid Mikayılov

İran ABŞ-ın ölkəyə mümkün hərbi müdaxiləsi halında regionda yerləşən ABŞ hərbi bazalarına zərbələr endirə biləcəyi barədə ABŞ qoşunlarına ev sahibliyi edən qonşu dövlətləri xəbərdar edib.

AzerVoice xəbər verir ki, bu barədə adının açıqlanmasını istəməyən yüksəkvəzifəli iranlı rəsmi məlumat verib.

Onun sözlərinə görə, Tehran Vaşinqtonun İranda davam edən hökumət əleyhinə etirazlara müdaxilə planlarının qarşısını almaq məqsədi ilə regional tərəfdaşlara açıq mesaj ötürüb.

Məlumata əsasən, ABŞ-ın regiondakı əsas hərbi obyektlərindən biri olan Qətərdəki Əl-Udeyd aviabazasında xidmət edən bəzi amerikalı personalın təhlükəsizlik məqsədilə bazanı tərk etməsi tövsiyə olunub. Diplomatlar bu addımı “mövqe dəyişikliyi” kimi qiymətləndirib və hələlik genişmiqyaslı hərbi evakuasiya əlamətlərinin müşahidə olunmadığını bildiriblər.

ABŞ Prezidenti Donald Tramp son günlər İranda etirazçılara qarşı zorakılığın artacağı təqdirdə “çox sərt addımlar” atılacağını bəyan edib. O, açıq şəkildə İran xalqını etirazları davam etdirməyə çağıraraq, Vaşinqtonun bu prosesləri yaxından izlədiyini vurğulayıb.

İranlı rəsminin sözlərinə görə, Tehran Səudiyyə Ərəbistanı, BƏƏ və Türkiyə daxil olmaqla region ölkələrinə bildirib ki, ABŞ İrana zərbə endirərsə, həmin ölkələrdə yerləşən ABŞ bazaları legitim hədəf hesab ediləcək. Eyni zamanda, İranın xarici işlər naziri Abbas Əraqçi ilə ABŞ prezidentinin xüsusi nümayəndəsi arasında mövcud olan birbaşa əlaqə xəttinin də dayandırıldığı qeyd olunub.

Bununla yanaşı, Qərb rəsmiləri bildiriblər ki, İran hakimiyyəti hazırda ciddi daxili təzyiqlərlə üzləşsə də, təhlükəsizlik strukturları vəziyyətə nəzarəti saxlayır. Hüquq-müdafiə təşkilatlarının məlumatına görə, etirazlar zamanı minlərlə insan həlak olub, on minlərlə şəxs isə saxlanılıb.