BAKI, AzerVoice

Bakı Fond Birjası (BFB) və “PwC Azərbaycan” Azərbaycanın kapital bazarlarının inkişafının dəstəklənməsi və ölkənin maliyyə ekosisteminin gücləndirilməsi məqsədilə Anlaşma Memorandumu imzalayıb.

Bu barədə AzerVoice Bakı Fond Birjasına istinadən xəbər verir.

Anlaşma Memorandumu Bakı Fond Birjasının İdarə Heyətinin sədri Ruslan Xəlilov və “PwC Azərbaycan” şirkətinin ölkəüzrəİdarəedici Partnyor, Şaukat Tapia tərəfindən imzalanaraq tərəflərin kapital bazarı iştirakçılarının potensialının artırılması, emitentlərin bazara hazırlıq səviyyəsinin gücləndirilməsi, eləcə də kapital bazarlarında şəffaflığın və qabaqcıl təcrübələrin təşviqi istiqamətində birgə fəaliyyətə sadiqliyini təsdiqləyir.

Bu tərəfdaşlığın rəsmiləşdirilməsi ilə Bakı Fond Birjası və “PwC Azərbaycan” Azərbaycanın kapital bazarlarında dayanıqlı, şəffaf və səmərəli mühitin formalaşdırılmasına, iqtisadi artımın dəstəklənməsinə, investisiya axınlarının təşviqinə və biznes subyektləri ilə investorlar üçün yeni imkanların yaradılmasına yönəlmiş ortaq dəyərlərini və uzunmüddətli öhdəliklərini bir daha nümayiş etdirir.