BAKI, AzerVoice
Qətərin sabiq baş naziri və xarici işlər naziri Həmd bin Cəssim bin Cabir Al Sani ABŞ ilə İran arasında mümkün hərbi qarşıdurmanın region üçün ciddi fəsadlar yarada biləcəyi barədə xəbərdarlıq edib.
O, sosial şəbəkədə paylaşdığı açıqlamada Vaşinqton və Tehran arasında “ciddi və qısa” danışıqların aparılmasının vacibliyini vurğulayaraq, İrana qarşı hərbi addımın nə ABŞ-ın regiondakı müttəfiqlərinin, nə də Yaxın Şərqin sabitliyinin xeyrinə olmayacağını bildirib. Sabiq baş nazir İran daxilində sabitliyin pozulmasının “nəticələri bəlli olmayan xaosa” yol aça biləcəyini qeyd edib.
Həmd bin Cəssim, Tehranla dərin fikir ayrılıqlarına baxmayaraq, dialoqun yeganə çıxış yolu olduğunu bildirib və ABŞ administrasiyasını danışıqlar masasına qaytarmaq üçün vahid Körfəz mövqeyinin formalaşdırılmasına çağırıb.
Açıqlama regional gərginliyin artdığı bir vaxta təsadüf edib. İran daxilində geniş etiraz aksiyaları davam etdiyi bir vaxtda ABŞ prezidenti Donald Tramp administrasiyası “maksimum təzyiq” siyasətini və mümkün hərbi variantları gündəmdə saxlayır.
Müşahidəçilərin fikrincə, bu mövqe Körfəz ölkələrinin bir hissəsində İran rejiminin çökməsinin regionda təhlükəsizlik və iqtisadi baxımdan ciddi sarsıntılara səbəb ola biləcəyi ilə bağlı narahatlıqları əks etdirir.
Paylaşım sosial şəbəkələrdə ziddiyyətli reaksiyalar doğurub. Bəzi istifadəçilər dialoqun müharibənin qarşısını almağın yeganə yolu olduğunu bildirərək mövqeni dəstəkləyib. Digərləri isə açıqlamanı Tehrandakı rejimə dolayı dəstək kimi qiymətləndirərək kəskin tənqid edib.
İraqlı, suriyalı və yəmənli fəallar Qətərin regiondakı əvvəlki siyasətini xatırladaraq, bu mövqeni “İran rejiminin müdafiəsi” kimi dəyərləndiriblər. Digər tərəfdən, bəzi şərhçilər hərbi eskalasiyanın bütün region üçün təhlükəsizlik və iqtisadi böhran yaradacağı barədə xəbərdarlıq edərək açıqlamanı realist yanaşma adlandırıblar.
Analitiklər qeyd edirlər ki, Həmd bin Cəssimin regional mövzularla bağlı açıqlamaları rəsmi vəzifə daşımamasına baxmayaraq, tez-tez Qətərin qeyri-rəsmi diplomatik mesajları kimi qəbul olunur və ərəb ictimai rəyində geniş müzakirələrə səbəb olur.