BAKI, AzerVoice, Nailə Babazadə

Vatikan Dövlətinin başçısı Papa XIV Leo, başda Rusiya–Ukrayna müharibəsi olmaqla, dünyada Milad bayramı münasibətilə 24 saatlıq atəşkəsə əməl olunması çağırışı edib.

AzerVoice xəbər verir ki, Papa dünən axşam saatlarında həftəlik istirahətini keçirdiyi Romanın yaxınlığındakı Kastel Qandolfo qəsəbəsindəki iqamətgahından Vatikana yola düşərkən onu gözləyən jurnalistlərin suallarını cavablandırıb.

Xristian aləminin İsa Məsihin doğumunu qeyd etdiyi Milad bayramı ərəfəsində hər hansı çağırışı olub-olmadığı soruşulan Papa XIV Leo belə deyib:
“Doğrusu, məni çox kədərləndirən məsələlərdən biri Rusiyanın Milad atəşkəsini rədd etməsidir. Bütün xoş niyyətli insanlara bir daha müraciət edirəm: Heç olmasa İsanın doğumunun qeyd edildiyi bu gündə Ukraynada və bütün dünyada 24 saatlıq atəşkəsə hörmət edilsin.”

Yaxın Şərqdə, xüsusilə Qəzzadakı vəziyyətlə bağlı sual verildikdə Papa, Qüdsün Latın Patriarxı Kardinal Pierbattista Pizzaballanın son günlərdə Qəzzaya səfər etdiyini xatırladaraq, özünün də təxminən bir saat əvvəl Qəzza şəhərindəki Müqəddəs Ailə Kilsəsinin keşişi Qabriel Romanelli ilə telefonla danışdığını bildirib.

Papa oktyabr ayında Qəzzada qüvvəyə minən atəşkəs və sülh planına diqqət çəkib.

“Onlar hələ də çox kövrək bir vəziyyətin içində bayramı qeyd etməyə çalışırlar. Ümid edirik ki, sülh razılaşması irəliləyiş əldə edəcək.” - deyə Papa qeyd edib.