BAKI,AzerVoice, Fərid Mikayılov

Ukrayna tərəfi Rusiyanın paytaxt Kiyev və Xarkiv şəhərlərinə raket və pilotsuz uçuş aparatları (PUA) ilə hava hücumları həyata keçirdiyini bildirib.

AzerVoice xəbər verir ki, Kiyev şəhərinin meri Vitali Kliçko sosial şəbəkə hesabında verdiyi açıqlamada, Rusiya ordusunun paytaxta PUA hücumu təşkil etdiyini qeyd edib.

Onun sözlərinə görə, hücum nəticəsində şəhərdə uşaq bağçası və bir neçə yaşayış binası zərər görüb, ilkin məlumata əsasən iki nəfər yaralanıb.

Xarkiv şəhərinin meri İqor Terexov isə bildirib ki, Rusiya qüvvələri gecə və səhər saatlarında şəhəri raket atəşinə tutub. Hücumlar nəticəsində bir sıra infrastruktura ziyan dəyib, hadisə yerində təhlükəsizlik tədbirləri gücləndirilib.

Ukrayna Silahlı Qüvvələrinin Hərbi Hava Qüvvələri Komandanlığının yaydığı rəsmi məlumata görə, Rusiya ordusu Ukrayna ərazisinə qarşı 2 ədəd “İskəndər-M” tipli ballistik raket və “Şahed”, “Gerbera” və “İtalmas” tipli ümumilikdə 183 pilotsuz uçuş aparatı ilə hücum həyata keçirib.

Açıqlamada qeyd olunub ki, Ukrayna hava hücumundan müdafiə qüvvələri 156 PUA-nı zərərsizləşdirib. Hücum zamanı raketlər və digər PUA-lar ölkə üzrə 16 müxtəlif nöqtəyə düşüb.

Ukrayna rəsmiləri vəziyyətin nəzarət altında olduğunu bildirərək, əhalini hava həyəcanı siqnallarına ciddi yanaşmağa çağırıb.