BAKI,AzerVoice, Fərid Mikayılov

Birləşmiş Ərəb Əmirliklərinin paytaxtı Əbu-Dabidə Rusiya, Ukrayna və ABŞ arasında keçirilən üçtərəfli danışıqlar konkret tapşırıqlar siyahısının hazırlanması ilə yekunlaşıb.

AzerVoice xəbər verir ki, görüşün nəticəsi kimi Kiyev, Moskva və Vaşinqtona təqdim olunacaq “ev tapşırıqları” siyahısı formalaşdırılıb və növbəti danışıqlar raundu məhz bu tapşırıqların icrası əsasında baş tutacaq.

Ukraynalı rəsmi bildirib ki, danışıqlarda irəliləyiş əhəmiyyətli olub. Onun sözlərinə görə, siyasi qərarlar qəbul edilməzdən əvvəl Rusiya və Ukrayna hərbçiləri texniki məsələlər üzərində birgə işləməlidirlər.

Bu çərçivədə qoşunların ayrılması, monitorinq mexanizmləri və mümkün atəşkəsin praktiki icrası ilə bağlı texniki detalların əvvəlcədən razılaşdırılmasının vacibliyi vurğulanıb.

Rəsmi qeyd edib ki, bu proses ictimaiyyət üçün cəlbedici görünməsə də, son dərəcə əhəmiyyətlidir, çünki texniki hazırlıq olmadan hərbi əməliyyatların dayandırılması riski yüksək qalır.

Üçtərəfli danışıqların ikinci raundu 4-5 fevral tarixlərində keçirilib. Daha sonra Ukrayna prezidentinin ofisinin rəhbəri Kirill Budanov da görüşlərin konstruktiv keçdiyini bildirib.

Mənbələrə görə, növbəti mərhələdə tərəflərin üzərinə düşən tapşırıqların icra vəziyyəti qiymətləndiriləcək və bundan sonra siyasi səviyyədə qərarların qəbuluna keçid mümkün ola bilər.