BAKI, AzerVoice, Nailə Babazadə

İranda hava çirkliliyinin qarşısının alınması məqsədilə Tehran Neft Emalı Zavodunda Euro-5 standartlarına uyğun benzin istehsalına başlanacağı bildirilib.

AzerVoice xəbər verir ki, İran hökumətinin sözçüsü Fatimə Mühacirani paytaxt Tehranda keçirdiyi mətbuat konfransında gündəmdəki məsələləri dəyərləndirib. O, hava çirkliliyi ilə mübarizə üçün ciddi qərarların qəbul edildiyini açıqlayıb.

Mühacirani gələn ildən etibarən Tehran Neft Emalı Zavodunda Euro-5 benzin istehsalına başlanacağını və bunun şəhərdəki hava çirkliliyinin azalmasına müsbət təsir göstərəcəyini bildirib.

Sözçü ölkədə xüsusilə ətraf mühitlə bağlı qanunların tam şəkildə tətbiq olunmamasını tənqid edərək, hökumətin köhnə nəqliyyat vasitələrinin sürətli şəkildə utilizasiyasını diqqətlə izlədiyini qeyd edib.

O həmçinin, ictimai nəqliyyat infrastrukturunun hələ də istənilən səviyyədə olmadığını və idxal edilən elektrikli nəqliyyat vasitələrinin də ehtiyacı qarşılamaq üçün kifayət etmədiyini vurğulayıb.

İran Prezidenti Məsud Pezeşkianın hökumət proqramlarının ətraf mühitlə uyğunluğuna xüsusi həssaslıq göstərdiyini qeyd edib.

“Prezident, avtomobil istehsalçıları ilə keçirdiyi görüşdə yanacağa qənaət edən avtomobillərin istehsalının artırılması barədə xəbərdarlıq edib. Hökumətin hibrid avtomobillərin sayını artırmaqla bağlı da planları var.” - deyə Mühacirani vurğulayıb.

Euro-5 benzin və ya dizel ilə işləyən avtomobillər daha aşağı egzoz emissiyası səbəbilə Euro-4 mühərrikli nəqliyyat vasitələrinə nisbətən ətraf mühitə daha az zərər verir.