BAKI, AzerVoice, Orxan Qədirzadə
Suriya ordusu son sutka ərzində həyata keçirdiyi hərbi əməliyyatlar nəticəsində Fərat çayının qərbində strateji mövqeləri SDQ nəzarətindən çıxarıb.
AzerVoice xəbər verir ki, Suriya Silahlı Qüvvələri son 24 saat ərzində Deyr Hafir və Məskənə xəttində apardığı əməliyyatları uğurla başa çatdıraraq ərazini terrorçu qruplaşmalardan təmizləyib. Ordunun Tabka istiqamətində irəliləməsi nəticəsində Safyan və Əs-Savra neft yataqları, eləcə də Ər-Rəsafə yol qovşağı tam nəzarətə götürülüb. Bununla da SDQ-nin Fəratın qərbindəki əsas iqtisadi dayaqlarından biri kəsilib.
Suriya Təhlükəsizlik Qüvvələri Fəratın qərb hissəsini hərbi zona elan edərək gecə saatlarında başlatdığı əməliyyatları qısa müddətdə nəticələndirib. Əldə edilən irəliləyiş fonunda ordu birlikləri SDQ-nin nəzarətində olan Rakka vilayətinə bağlı Tabka şəhəri istiqamətində hərəkəti davam etdirir və artıq vilayətin inzibati sərhədlərinə çatıb.
Suriya Müdafiə Nazirliyinin Hərbi Əməliyyatlar Komandanlığı Tabka kənd ərazilərində aparılan əməliyyatlarla bağlı məlumat yayaraq bildirib ki, Safyan neft yatağı, Əs-Savra neft yatağı və Ər-Rəsafə qovşağı üzərində tam nəzarət təmin edilib. Rəsmi açıqlamada bu ərazilərin həm iqtisadi, həm də strateji baxımdan xüsusi əhəmiyyət daşıdığı vurğulanıb. Yeraltı enerji ehtiyatlarının nəzarətə götürülməsi Suriya ordusunun enerji təhlükəsizliyi baxımından mühüm uğuru kimi qiymətləndirilir.
Suriya ordusu YPG/SDQ-yə qarşı əməliyyatları Fərat çayı boyunca genişləndirərək Rakkanın cənubu və Tabka bəndi istiqamətində yeni cəbhə açıb. Hərbi mənbələrin məlumatına görə, əməliyyatlar mərhələli şəkildə davam etdiriləcək.
Əməliyyatların davam etdiyi Tabka bölgəsi ilə bağlı Suriya Ordusunun Hərbi Əməliyyatlar Komandanlığı üç ayrı əməliyyat xəritəsi yayımlayaraq mülki əhaliyə çağırış edib. Bildirilib ki, müəyyən edilən ərazilər terrorçu qruplar tərəfindən hücumların planlaşdırılması üçün istifadə olunur və mülki şəxslərin təhlükəsizliyi məqsədilə həmin zonalardan uzaq durmaları vacibdir.
Rəsmi bəyanatda vurğulanıb ki, qeyd olunan ərazilər PKK və SDQ silahlı qrupları, eləcə də keçmiş rejimin qalıqları tərəfindən Suriya əhalisi və orduya qarşı terror fəaliyyətləri üçün istifadə olunub.
Yayımlanan əməliyyat xəritələrindən birincisində Tabka şəhəri ərazisində əsas yol ayrıcıları və ətraf tikililər hədəf kimi göstərilib. Hərbi mənbələr bu nöqtələrin terrorçu qruplar tərəfindən komanda mərkəzi kimi istifadə edildiyini bildirib. Digər xəritədə isə Fərat çayı boyunca uzanan sıx yaşayış massivlərinin hərbi mövqeyə çevrildiyi qeyd olunub və mülki şəxslərdən təhlükəsiz zonalara keçmək tələb edilib.
Üçüncü xəritədə isə coğrafi baxımdan strateji yarımada ərazisinin SDQ/YPG tərəfindən silah-sursat və idarəetmə mərkəzi kimi istifadə edildiyi açıqlanıb.