BAKI, AzerVoice, Nailə Babazadə

ABŞ Prezidenti Donald Tramp çərşənbə günü “Truth Social” platformasında yazaraq bildirib ki, “Biz Cənubi Koreyaya Kanada ilə görüşməyə gəlməmişik!”, ABŞ-ın şimal qonşusu ilə yaşanan ticarət gərginliyi fonunda belə açıqlama verib.

AzerVoice xəbər verir ki, Tramp bu gün Koreya yarımadasının şərqində yerləşən Gyeongju şəhərinə gəlib və Asiya-Sakit Okean İqtisadi Əməkdaşlıq Təşkilatının (APEC) sammitində iştirak edəcək.

“Soruşanlar üçün deyirəm, biz Cənubi Koreyaya Kanada ilə görüşməyə gəlməmişik”.- deyə Tramp sosial şəbəkə paylaşımında qeyd edib.

Qeyd edək ki, bu gün Trampın Kanada Baş naziri Mark Karni də daxil olmaqla, APEC liderlərinin iştirak edəcəyi rəsmi nahara qatılması planlaşdırılıb.

Karni bazar ertəsi bəyan etmişdi ki, Tramp hazır olduğu zaman ticarət mövzularında danışıqlara oturmağa hazırdır.

Ötən həftə Tramp Ottawa ilə ticarət danışıqlarının dayandırıldığını açıqlamış, Kanadanın mallarına 10 faiz əlavə gömrük rüsumu tətbiq etmişdi. Bu qərar, Ontarioda yayımlanan siyasi reklamda ABŞ-ın keçmiş prezidenti Ronald Reyqanın “gömrük rüsumları ticarət müharibələrinə və iqtisadi fəlakətə səbəb olur” sözlərinin istifadə edilməsindən sonra verilmişdi.

Digər tərəfdən, ABŞ Prezidenti Kim Çen In ilə görüşün baş tutmayacağını bildirib və səbəb kimi “uyğun vaxtın olmamasını” göstərib.

Tramp daha əvvəl verdiyi açıqlamalarda yaxın gələcəkdə Şimali Koreya lideri ilə görüşü istisna etmədiyini demişdi.

“Bir nöqtədə biz Şimali Koreya ilə məşğul olacağıq. Düşünürəm ki, onlar bunu istəyir, mən də istəyirəm”.-deyə o jurnalistlərə deyib:

Ötən həftə Tramp Cənubi Koreyaya səfəri zamanı Kim ilə görüşmək istədiyini söyləmişdi.