BAKI, AzerVoice, Nailə Babazadə

Avropa İttifaqı (AB) ölkələrində Tesla markalı avtomobillərin satışları avqust ayında ötən ilin eyni dövrü ilə müqayisədə 36,6 faiz azalıb.

AzerVoice xəbər verir ki, Avropa Avtomobil İstehsalçıları Assosiasiyası (ACEA), Avropa ölkələrinin yanvar-avqust ayları üzrə yeni avtomobil qeydiyyat məlumatlarını açıqlayıb.

Məlumata görə, ABŞ-lı milyarder Elon Maskın sahibi olduğu Tesla şirkətinin avtomobil satışları AB ölkələrində azalmağa davam edir.

Tesla satışlarındakı geriləmə artıq 8 aydır ki, davam edir.

Ötən ilin avqust ayında AB-də 12 min 966 Tesla avtomobili satılmışdısa, bu ilin avqustunda bu rəqəm 8 min 220-yə düşüb. Bununla da Tesla satışları keçən ilin eyni ayı ilə müqayisədə 36,6 faiz azalıb.

Şirkətin AB-dəki yeni avtomobil bazarındakı payı da avqustda 2 faizdən 1,2 faizə düşüb.

Tesla-nın yanvar-avqust dövründəki satışları da ötən ilin eyni dövrü ilə müqayisədə 42,9 faiz azalıb. Keçən il 150 min 37 olan satış rəqəmi bu il 85 min 673-ə enib. Şirkətin AB bazarındakı ümumi payı isə 2,1 faizdən 1,2 faizə düşüb.

AB-yə üzv ölkələr, Avropa Azad Ticarət Assosiasiyasına üzv olan İsveçrə, Norveç, İslandiya və Birləşmiş Krallıq daxil olmaqla, ümumilikdə Tesla satışları avqustda ötən ilin eyni dövrünə görə 22,5 faiz azalaraq 14 min 831, yanvar-avqust dövründə isə 32,6 faiz geriləyərək 133 min 857 olub.

Qeyd edək ki, Elon Maskın bir müddət əvvəl ABŞ-ın keçmiş prezidenti Donald Tramp ilə əməkdaşlığı, sərgilədiyi mübahisəli davranışlar və Avropa ölkələrində ifrat sağçı siyasətçilərə verdiyi açıq dəstək, avropalı müştərilərin şirkətdən uzaqlaşmasına səbəb olub.