BAKI, AzerVoice, Nailə Babazadə
Avropa İttifaqı İranda davam edən etiraz aksiyalarına qarşı güc tətbiqini və insan hüquqlarının kobud pozulmasını pisləyən qətnamə layihəsini böyük səs çoxluğu ilə təsdiqləyib.
AzerVoice xəbər verir ki, səsvermədə 562 deputat lehinə, 9 deputat isə əleyhinə səs verib. Qətnamədə minlərlə etirazçının öldürülməsindən ciddi narahatlıq ifadə olunub və bu yanaşma müxalifəti boğmaq üsulunda “strateji məhvə” doğru təhlükəli keçid kimi qiymətləndirilib. Sənəddə həbsdə olan bütün etirazçıların, hüquq müdafiəçilərinin və jurnalistlərin dərhal və qeyd-şərtsiz azad edilməsi tələb olunur.
Qətnamənin əsas məqamları sırasında İran İnqilab Keşikçiləri Korpusunun (SEPAH) yubanmadan “terror təşkilatı” kimi tanınması və sanksiyaların genişləndirilməsi tələbi yer alıb. Aİ internet kəsintiləri vasitəsilə tətbiq edilən senzuranı pisləyib, üzv ölkələrə iranlıların kiber manipulyasiyalardan qorunması üçün texniki dəstəyin artırılmasını tövsiyə edib. Həmçinin Aİ qurumlarına İran rejimi nümayəndələrinin girişinə qadağa qoyulması ideyası müsbət dəyərləndirilib.
Xatırladaq ki, İranda etirazlar 2025-ci il dekabrın 28-də milli valyutanın dəyərdən düşməsi və iqtisadi böhran fonunda başlayıb. Rəsmi məlumatlara görə, hadisələr zamanı təhlükəsizlik qüvvələri və mülki şəxslər daxil olmaqla 3 117 nəfər həyatını itirib. Aİ bəyan edir ki, Tehranla münasibətlərin normallaşması yalnız siyasi məhbusların azad edilməsi və demokratiya istiqamətində real addımlardan sonra mümkün ola bilər.