BAKI, AzerVoice, Nailə Babazadə
Belçika federal hökuməti İsrailə qarşı sanksiyalar tətbiq etmək və Fələstin dövlətini tanımaq barədə fövqəladə kabinet iclasında qərar qəbul edib.
AzerVoice xəbər verir ki, baş nazirin müavini və xarici işlər naziri Maksim Prevotun sözçüsü Laurens Soenen-in Anadolu Agentliyinin müxbiri ilə paylaşdığı razılaşma mətnində, xüsusilə Qəzza zolağında yaşanan humanitar faciəyə və İsrailin beynəlxalq hüquqa zidd hərəkətlərinə diqqət çəkilib.
Açıqlamada qeyd olunub ki, humanitar yardım ən prioritet məsələ olaraq qalacaq. Belçika Xarici İşlər və Müdafiə Nazirlikləri Qəzzada humanitar vəziyyətin yaxşılaşdırılması üçün fəaliyyətlərini davam etdirir. “Cerulean Skies 2” kimi hava yardımı əməliyyatlarının təkrarlanması da gündəmdədir.
Belçikanın bütün kanallar vasitəsilə fələstinlilərə humanitar yardım göstərməyə davam edəcəyi vurğulanıb. Bu il İnkişaf Əməkdaşlığı naziri tərəfindən vəd edilmiş 7 milyon avroya əlavə olaraq, 12,5 milyon avro da ayrıldığı bildirilib.
Bəyanatda vurğulanıb ki, Ümumdünya Səhiyyə Təşkilatının (ÜST) tələbi əsasında, bölgədə müalicəsi mümkün olmayan ağır vəziyyətdə olan uşaq xəstələrin tibbi təxliyəsinin intensivləşdiriləcəyi vurğulanıb.
Açıqlamada həmçinin bildirilib ki, zorakılığa meyilli yəhudi müstəmləkəçilər və HƏMAS üzvləri ilə bağlı milli səviyyədə açıq sanksiyalar hazırlanacaq. Bu çərçivədə maliyyə məhdudiyyətləri, əmlakın dondurulması və ölkəyə giriş qadağası kimi tədbirlər görüləcək.
Avropa İttifaqı (Aİ), Kanada və Birləşmiş Krallığın mövcud siyahıları əsasında hazırlanan bu tədbirlər nəticəsində Belçika adıçəkilən şəxsləri dərhal ölkədə “arzu olunmayan şəxs” elan edib.
