BAKI, Azervoice, Nərmin Ağayeva
Azərbaycan və Türkiyə iş dünyası arasında əməkdaşlıq daha da dərinləşir.
Azervoice xəbər verir ki, Müstəqil Sənayeçi və İş Adamları Dərnəyinin (MÜSİAD) Mersin şöbəsinin nümayəndə heyəti Bakıya səfər edib.
Səfər çərçivəsində MÜSİAD-ın Azərbaycan bölməsi ilə keçirilən görüşdə qarşılıqlı investisiya imkanları və gələcək əməkdaşlıq istiqamətləri müzakirə olunub.
MÜSİAD Mersin Şöbəsinin sədri Mehmet Sait Kaya başçılıq etdiyi nümayəndə heyəti ilə birlikdə MÜSİAD Azərbaycan Dərnəyinin Baş Qərargahında təşkil olunan görüşdə iştirak edib. Onları MÜSİAD Azərbaycan rəhbəri Rəşad Cabirli və idarə heyətinin üzvləri qarşılayıb. Görüş zamanı Azərbaycan və Türkiyə iş adamları təqdimatlarla çıxış edərək birgə investisiya sahələrini, strateji layihələri və əməkdaşlıq modellərini müzakirə ediblər.
Rəşad Cabirli çıxışında Azərbaycanın biznes və investisiya mühiti barədə məlumat verərək bildirib ki, ölkənin 10 ölkə ilə imzaladığı Azad Ticarət Sazişləri sayəsində Müstəqil Dövlətlər Birliyi (MDB) ölkələrinə rüsumsuz ticarət imkanları mövcuddur. O qeyd edib ki, bu üstünlüklər Azərbaycanı regionda istehsal və distribüsiya mərkəzinə çevirir.
“Türkiyəli sərmayədarlar üçün Azərbaycan təkcə qardaş ölkə deyil, həm də strateji imkanlar təklif edən iqtisadi tərəfdaşdır”, – deyə Cabirli bildirib.
O, həmçinin türkiyəli iş adamlarının ölkədəki potensialı daha yaxından tanımaları üçün hazırlanmış “Azərbaycana gəlmək üçün 101 səbəb” adlı nəşri də qonaqlara təqdim edib.
MÜSİAD Mersin Şöbəsinin sədri Mehmet Sait Kaya da çıxışında Azərbaycanla iqtisadi əlaqələrin inkişafının vacibliyini vurğulayıb.
“Azərbaycan bizim üçün yalnız dost və qardaş ölkə deyil, həm də sərmayə və istehsal baxımından vacib tərəfdaşdır. Qardaşlıq əlaqələrimizi investisiyaya çevirəcəyik”, – deyə o bildirib.
Kaya qeyd edib ki, təşkilat enerji, kənd təsərrüfatı, qida və logistika sahələrində ortaq layihələr həyata keçirmək niyyətindədir. Onun sözlərinə görə, MÜSİAD Mersin yalnız regional deyil, beynəlxalq səviyyədə də iş dünyasında fəal rol oynayır.
Sonda MÜSİAD Azərbaycan rəhbərliyinə göstərilən qonaqpərvərliyə görə təşəkkürünü bildirən Kaya,
“Bu səmimi münasibət qardaşlığımızın nə qədər güclü olduğunu bir daha sübut etdi. Biz təkcə türk iş adamlarını deyil, eyni zamanda ortaq gələcəyimizi dəstəkləyirik.” - deyə bildirib.
Qeyd edək ki, MÜSİAD (Müstəqil Sənayeçi və İş Adamları Dərnəyi) Türkiyənin və dünyanın müxtəlif bölgələrində fəaliyyət göstərən iş adamlarını bir araya gətirən, iqtisadi əlaqələrin möhkəmlənməsinə töhfə verən nüfuzlu təşkilatlardan biridir. Azərbaycandakı fəaliyyəti isə son illərdə daha da genişlənib.