BAKI,AzerVoice, Fərid Mikayılov

Lionel Messi-nin İnter Miami ilə müqaviləsini yeniləməsi yalnız argentinalı superulduzun deyil, həm də yaxın dostlarının gələcəyini müəyyən edə bilər.

AzerVoice xəbər verir ki, Messi 2023-cü ilin yayında Barselona və PSJ karyerasını bitirib MLS-ə yollanmışdı.

Onunla yanaşı keçmiş Barça yoldaşları Serxio Buskets və Jordi Alba da İnter Miamiyə qoşuldu. Daha sonra uruqvaylı hücumçu Luis Suares də komanda ilə birləşdi. Ən son olaraq, Argentina millisindən Rodriqo De Paul da Mayamidə Messiyə qoşularaq dünya çempionlarının dostluğunu genişləndirdi.

Messinin müqaviləsi 2025-ci ilin sonunda başa çatır, lakin yeni şərtlərlə uzadılması gündəmdədir. Bu, argentinalı əfsanənin 40 yaşına qədər karyerasını davam etdirməsinə imkan verə bilər. Suarez də dostunun yolunu izləyə bilər, lakin son illərdə yaşadığı diz zədələri onun gələcəyini sual altına qoyur.

Hazırda Messi hələ də yüksək formada çıxış edir. 2025 mövsümündə İnter Miami üçün bütün turnirlərdə 32 qol vurub və komandası ilə pley-off uğrunda mübarizə aparır. ABŞ-da ilin ən dəyərli oyunçusu (MVP) seçilən superulduz MLS Kubokunu da qazanmaq niyyətindədir.