BAKI, AzerVoice
Oreqon sahillərində elektrik keçirən yeni bakteriya növü aşkar edilib.
AzerVoice xəbər verir ki, amerikalı alimlər elektrik cərəyanını keçirə bilən və potensial olaraq ətraf mühitin təmizlənməsi ilə bioelektronika sahəsində tətbiq edilə biləcək yeni bakteriya növü kəşf ediblər.
Oreqon Dövlət Universitetindən Cheng Li və professor Clare Reimers-in rəhbərlik etdiyi tədqiqatçılar, ABŞ-ın Oreqon sahillərində palçıqlı ərazilərdə “Candidatus Electrotrix yaqonensis” adlandırılan bakteriyanı aşkarlayıblar. Bu bakteriya hüceyrələrinin birləşərək uzun saplar yaratması və nikellə zəngin keçirici lifləri sayəsində elektronları uzaq məsafələrə ötürməsi ilə seçilir.
Tədqiqatçılar bildirirlər ki, yeni növ, Ca. Electrotrix və Ca. Electronema kimi tanınan kabel bakteriyalarına genetik olaraq bənzəyir və onların arasında mümkün təkamül körpüsünü təmsil edə bilər. Həmçinin, bu növ bakteriyanın səthində digər növlərlə müqayisədə üç dəfə çox qabarıq silsilələr müşahidə olunub.
Bu elektrik keçirici bakteriya növü, çirklənmiş torpaqlardan zərərli maddələrin çıxarılması kimi ekoloji təmizləmə üsullarında istifadə oluna bilər. Eyni zamanda, onun quruluşundakı yüksək keçiriciliyə malik nikel örtüklü zülallar, yeni bioelektronika texnologiyalarının inkişafı üçün innovativ imkanlar yarada bilər.
Qeyd edək ki, bakteriyaya “yaqonensis” adı onun tapıldığı bölgədə tarixən yaşamış yerli Yaqona icmasının şərəfinə verilib. Bu icmanın nəsilləri hazırda Siletz Qəbilələri Konfederasiyası çərçivəsində yaşamlarını davam etdirirlər.
