BAKI,AzerVoice, Fərid Mikayılov

ABŞ Prezidenti Donald Tramp 2028-ci il prezident seçkilərində özünə mümkün varis məsələsində mövqe tutmaqdan imtina edib.

AzerVoice xəbər verir ki, o, vitse-prezident Cey Di Vens ilə dövlət katibi Marko Rubio arasında seçim etməyəcəyini bildirib.

Tramp qeyd edib ki, hər iki siyasətçi hazırda öz vəzifələrini yüksək səviyyədə icra edir və bu mərhələdə varislik məsələsini gündəmə gətirmək istəmir. Prezidentin sözlərinə görə, seçkilərə hələ üç il vaxt qalır və indidən bu mövzuda mübahisə yaratmaq niyyətində deyil.

“Cey Di də, Marko da fantastikdir. Onlar çox ağıllı və bacarıqlı insanlardır. İndi bu barədə danışmaq istəmirəm” - deyə Tramp bildirib.

Reuters agentliyinin məlumatına görə, Ohayo ştatından sabiq senator olan Cey Di Vens noyabrda keçiriləcək aralıq seçkilərindən sonra Tramp ilə namizədlik ehtimalını müzakirə etməyi planlaşdırır. Respublikaçı dairələrdə isə sabiq Florida senatoru və hazırkı dövlət katibi Marko Rubionun da 2028-ci il üçün namizəd ola biləcəyi ehtimalları müzakirə olunur.

Tramp müsahibəsində hər iki siyasətçinin eyni seçki bileti ilə yarışa qoşulmasının güclü kombinasiya ola biləcəyini də istisna etməyib. O, Rubionu bir qədər “daha diplomatik”, Vensi isə fərqli üsluba malik siyasətçi kimi xarakterizə edib.

Eyni zamanda Tramp, əvvəlki açıqlamalarında olduğu kimi, üçüncü dəfə prezidentliyə namizəd olmaq ehtimalına da eyham vurub. 2029-cu ildə də Ağ Evdə qala biləcəyi ilə bağlı sualı cavablandıran Tramp, “Maraqlı olardı” deməklə kifayətlənib.

Qeyd edək ki, 2028-ci il seçkilərində həm Respublikaçılar, həm də Demokratlar Partiyasında geniş və rəqabətli namizədlər siyahısının formalaşacağı gözlənilir.