BAKI,AzerVoice, Fərid Mikayılov

ABŞ-a məxsus hərbi qüvvələr Suriyanın şimal-şərqində, Həsəkə vilayətinin Əl-Şəddadi bölgəsində yerləşən hərbi bazadan tam şəkildə geri çəkilməyə hazırlaşır. Məlumata görə, geriçəkilmə prossesinin növbəti 24 saat ərzində tamamlanacağı gözlənilir.

AzerVoice xəbər verir ki, beynəlxalq koalisiyaya aid yük maşınlarından ibarət karvan İraq ərazisindən Yaarubiya sərhəd keçidi vasitəsilə Suriyaya daxil olaraq Əl-Şəddadi bazasına istiqamət alıb.

Şahidlər boş yük maşınlarının bazadakı hərbi texnikanın daşınması üçün göndərildiyini bildiriblər.

Eyni zamanda, ABŞ ordusuna məxsus digər mühüm hərbi obyekt – Xarəb əl-Cir bazasının da boşaldıldığı qeyd olunur. Yerli sakinlər bazada dron səslərinin eşidildiyini, vaxtaşırı atəş səslərinin gəldiyini və bəzi mövqelərin məhv edildiyini bildiriblər. Bu addımlar beynəlxalq koalisiya qüvvələrinin bazanı tam tərk etməsi ilə əlaqələndirilir.

ABŞ qüvvələrinin geri çəkilməsi fonunda Suriya hökumət qüvvələri Qamışlı şəhərinə daxil olub. Daxili təhlükəsizlik qüvvələrinin karvanı şəhərə daxil olaraq hava limanı və hökumət binalarına nəzarəti ələ almağa hazırlaşır.

Qeyd edək ki, son həftələrdə kürd silahlı qüvvələri hökumət ordusunun irəliləməsi fonunda bir sıra əraziləri tərk edib. Bu proses Suriya rəhbərliyinin ölkə ərazisində mərkəzi hakimiyyəti bərpa etmək cəhdləri ilə əlaqələndirilir.