BAKI, AzerVoice, Fərid Mikayılov

İranın xarici işlər naziri Abbas Əraqçi və Səudiyyə Ərəbistanının xarici işlər naziri Feysəl bin Fərhan Al Səud regional sabitliyin təşviqi üçün ikitərəfli əməkdaşlığın gücləndirilməsinin vacibliyini vurğulayıblar.

AzerVoice xəbər verir ki, nazirlər Səudiyyə Ərəbistanının Ciddə şəhərində keçirilən İslam Əməkdaşlıq Təşkilatının (İƏT) fövqəladə xarici işlər nazirləri toplantısı çərçivəsində görüşüblər.

Görüşdə tərəflər regional və beynəlxalq vəziyyəti, xüsusilə də Qəzzada gərgin humanitar böhranı və İsrailin davam edən hücumlarını müzakirə ediblər. Onlar İslam ölkələrinin koordinasiyasının artırılmasının, hücumların dərhal dayandırılmasının və humanitar yardımın bölgəyə maneəsiz çatdırılmasının vacibliyini qeyd ediblər.

Əraqçi və bin Fərhan ikitərəfli münasibətlərdəki son irəliləyişlərdən məmnunluqlarını ifadə edərək, siyasi, iqtisadi, təhlükəsizlik və regional sahələrdə əməkdaşlığın daha da genişləndirilməsi üçün məsləhətləşmələrin davam etdirilməsinin önəmini vurğulayıblar.

Nazirlər həmçinin İran-Səudiyyə əməkdaşlığının regional sabitlikdə mühüm rol oynadığını, bunun dialoq, qarşılıqlı hörmət və ölkələrin daxili işlərinə qarışmamaq prinsiplərinə əsaslanan yeni bir regional nizamın qurulmasına töhfə verə biləcəyini bildiriblər.