BAKI, AzerVoice, Nailə Babazadə

İran Xarici İşlər Nazirliyinin sözçüsü İsmayıl Bəqayi ABŞ Prezidenti Donald Trampın İran hakimiyyətinin 800-dən çox edam qərarını ləğv etməsi barədəki açıqlamalarına reaksiya verib.

AzerVoice xəbər verir ki, Bəqayi həftəlik mətbuat konfransında çıxış edərək bu ifadələri məsuliyyətsiz və həqiqətdən uzaq adlandırıb. O qeyd edib ki, məhkəmə prosesləri müəyyən zaman tələb edir və bu qədər əhəmiyyətli məsələ barədə belə sürətli qərar verilməsi hüquqi baxımdan mümkün deyil.

Bəqayi ölkədəki etirazlar zamanı bəzi səfirliklərin bağlanması barədə yayılan xəbərlərə də aydınlıq gətirib. O bildirib ki, internetin kəsilməsi və yaranan narahatlıq səbəbindən bəzi diplomatlar müvəqqəti olaraq ölkələrinə qayıtsalar da, heç bir səfirlik tamamilə bağlanmayıb. İran tərəfi gedən diplomatların tezliklə geri dönəcəyinə və səfirliklərin fəaliyyətinin normallaşacağına ümid etdiyini vurğulayıb.

Xatırladaq ki, ABŞ Prezidenti Donald Tramp 16 yanvar 2026-cı il tarixində etdiyi paylaşımda İran rəhbərliyinin bir gün əvvəl planlaşdırılan 800-dən çox edam hökmünü ləğv etməsinə böyük hörmətlə yanaşdığını bildirərək Tehran administrasiyasına təşəkkür etmişdi. Lakin rəsmi Tehran belə bir kütləvi edam planının və ya ləğv qərarının olmadığını bildirir.

İranda 2025-ci ilin dekabr ayının sonunda iqtisadi çətinliklər və yerli valyutanın dəyərdən düşməsi səbəbindən başlayan etirazlar ölkə genelinə yayılmışdı. HRANA insan haqları agentliyinin yanvarın ortalarına olan məlumatına görə, hadisələr zamanı 3308 nəfər həyatını itirib, 24 266 nəfər isə saxlanılıb. Hazırda ölkədə nümayişlərin böyük ölçüdə səngidiyi müşahidə olunur.