BAKI, AzerVoice , Nərmin Ağayeva

ABŞ-ın Luiziana ştatında yanacaq zavodunda baş verən güclü partlayış əhali arasında panikaya səbəb olub və yaxınlıqdakı sakinlər təxliyə edilib.

AzerVoice xəbər verir ki, partlayış Roseland şəhərində yerləşən Smitty's Supply yanacaq və avtomobil sürtkü yağları zavodunda qeydə alınıb. Yerli vaxtla saat 13:00-da baş verən hadisə nəticəsində xəsarət alan olmayıb. Təxminən 400 nəfərin çalışdığı müəssisədə partlayışın səbəbləri araşdırılır. Tangipahoa Parish prezidenti Robbi Miller bildirib ki, “vətəndaşların, binaların və ətraf mühitin təhlükəsizliyini təmin etmək üçün bütün tədbirlər görülür”.

Hadisə zamanı güclü titrəyişlərin müşahidə edildiyini bildirən sakinlər evlərdən təxliyə olunub. ABŞ-ın Ətraf Mühitin Keyfiyyəti Departamenti havada potensial sağlamlıq risklərinin mövcudluğunu araşdırır. Təxliyyə edilən sakinlərin evlərinə nə vaxt dönə biləcəkləri barədə məlumat verilməyib.

Qeyd edək ki, 1960-cı ildə qurulan Smitty's Supply ABŞ-ın ən böyük özəl yanacaq və neft məhsulları istehsalçılarından biridir və avtomobil sürtkü yağları, antifriz, hidravlik mayelər kimi məhsullar istehsal edir.