BAKI, AzerVoice, Səməd Əyyubov
ABŞ prezidenti Donald Trampın administrasiyası qeyri-qanuni miqrantların saxlanılması üçün hərbi bazalarda xüsusi obyektlərin yaradılması istiqamətində praktiki addımlar atmağa başlayıb.
AzerVoice-un məlumatına görə, ilk belə mərkəzin Texas ştatının Meksika sərhədində yerləşən El Paso bölgəsindəki “Fort Bli” hərbi bazasında qurulması nəzərdə tutulur.
ABŞ Miqrasiya və Gömrük Mühafizəsi İdarəsinin rəsmilərinin bildirdiyinə görə, bu mərkəz artıq bu ay minədək şəxsi qəbul etməyə hazırlaşır.
Planlara əsasən, “Fort Bli” bazasının tutumu gələcəkdə 5 min nəfərə çatdırılacaq və bu, ABŞ-da mülki şəxslər üçün yaradılmış ən böyük saxlama mərkəzi olacaq. Müdafiə naziri Pit Heqset ötən ay İndiana ştatındakı “Etterberi” hərbi düşərgəsi və Nyu-Cersidəki “Makquayr-Diks-Leykherst” bazasının da müvəqqəti olaraq minlərlə qeyri-qanuni miqrantın saxlanması üçün istifadəsinə razılıq verib.
Mənbələr bildirir ki, Heqset həmçinin Kuba ərazisində yerləşən Qvantanamo Hərbi Dəniz Bazasında çarpayıların sayının artırılmasına da razılıq verib. Lakin bu artım Trampın arzuladığı səviyyədən uzaqdır.
Bu hərbi bazalar Tramp administrasiyasının ABŞ-dan sürətli deportasiya mexanizmini həyata keçirmək planlarında əsas rol oynayır. Müdafiə Nazirliyi ilə yanaşı, Daxili Təhlükəsizlik Nazirliyinin də bu planlarda rolu artmaqdadır, çünki ölkənin şimal bölgələrindəki saxlanma mərkəzlərində yerlər çatışmır və bəzi ştatlar federal immiqrasiya qanunlarının icrasına dəstək verməkdən imtina edir.
Xatırladaq ki, bu ilin əvvəlində immiqrantların bir qismi Qvantanamoya göndərildikdə, onların hüquqlarını müdafiə edən təşkilatlar bu qərara qarşı məhkəməyə müraciət etmiş və miqrantların hüquqi yardıma çıxışlarının məhdudlaşdırıldığını bildirmişdilər.
Yay aylarında bəzi miqrantlar müvəqqəti olaraq Florida ştatındakı Everqleydz saxlanma mərkəzinə köçürülüblər. Orada saxlanılanlar şəraitin pis olması və hüquqi vəziyyətlərinə dair şikayətləri təqdim edə bilməməkdən narazı qalıblar.
"The Washington Post" qəzetinin yazdığına görə, nazir Heqset “Etterberi” və “Makquayr-Diks-Leykherst” bazalarında lisenziyasız müvəqqəti saxlama mərkəzlərinin qurulmasına da razılıq verib. Həmin obyektlərin istifadəyə verilmə vaxtı Daxili Təhlükəsizlik Nazirliyi ilə koordinasiyalı şəkildə müəyyənləşdiriləcək.
ABŞ Miqrasiya və Gömrük Mühafizəsi İdarəsinin rəsmiləri bildirib ki, “Fort Bli” bazasında avqustun 17-nə qədər min nəfərin saxlanması planlaşdırılır.