BAKI, AzerVoice, Orxan Qədirzadə
Beynəlxalq media assosiasiyası İsrail hökumətinin Qəzzaya jurnalistlərin sərbəst girişinə qoyduğu qadağanı atəşkəsə baxmayaraq davam etdirməsini kəskin tənqid edib.
AzerVoice xəbər verir ki, Foreign Press Association (Xarici Mətbuat Assosiasiyası – FPA) çərşənbə axşamı yaydığı bəyanatda İsrail hökumətinin mövqeyindən “dərin məyusluq” ifadə edib. Bildirilib ki, hökumət iki gün əvvəl Ali Məhkəməyə təqdim etdiyi mövqedə qadağanın “təhlükəsizlik səbəbləri” ilə qüvvədə saxlanılmalı olduğunu bəyan edib.
Qeyd edək ki, İsrail 2023-cü ilin oktyabrında Qəzzada müharibə başlayandan bəri xarici jurnalistlərin bölgəyə müstəqil şəkildə daxil olmasına icazə vermir. Bu mövqe Qəzza ərazisinə azad və maneəsiz media girişinin təmin olunmasını tələb edən FPA-nın məhkəməyə müraciətinə cavab olaraq səsləndirilib.
İsrail, Qəzza və işğal olunmuş İordan çayının qərb sahilində fəaliyyət göstərən beynəlxalq media qurumlarının jurnalistlərini təmsil edən FPA yaxın günlərdə məhkəməyə “sərt və əsaslandırılmış cavab” təqdim edəcəyini açıqlayıb.
Assosiasiyanın bəyanatında deyilir:
“Qəzzaya jurnalistlərin müstəqil şəkildə daxil olmasına imkan verən konkret plan təqdim etmək və fələstinli cəsur həmkarlarımızla yanaşı işləməyimizə şərait yaratmaq əvəzinə, hökumət bizi bir daha bölgədən kənarda saxlamağa qərar verib. Bu isə artıq atəşkəsin qüvvədə olduğu bir vaxtda baş verir”.
İsrail hökuməti isə yalnız məhdud sayda jurnalistin İsrail ordusu ilə birlikdə, fərdi icazə əsasında Qəzzada işləməsinə imkan verdiyini bildirir. Məhkəməyə təqdim edilən sənəddə qeyd olunub ki, mövqe “müdafiə qurumlarının yanaşmasına əsaslanır” və jurnalistlərin Qəzzaya girişinin son israilli girovun qalıqlarının axtarışına mane ola biləcəyi iddia edilib.
FPA məhkəməyə müraciətini 2024-cü ilin sentyabrında təqdim edib. Məhkəmə bu müddət ərzində hökumətə bir neçə dəfə möhlət verib. Son olaraq, yanvarın 4-ü Qəzzaya media girişinə dair planın təqdim olunması üçün son tarix kimi müəyyən edilib.
Bu arada International Federation of Journalists-in məlumatına görə, 2025-ci ildə Fələstin jurnalistlər üçün dünyanın ən təhlükəli məkanı olub. Bildirilib ki, il ərzində 56 fələstinli media əməkdaşı həlak olub.
Müharibə başlayandan bəri Qəzzada ümumilikdə təxminən 300 jurnalist və media işçisi öldürülüb. Bu rəqəmlər Shireen.ps monitorinq platformasına istinadən açıqlanıb. Sayt 2022-ci ildə işğal olunmuş İordan çayının qərb sahilində öldürülmüş “Əl-Cəzirə”nin veteran müxbiri Şirin Əbu Aklenin adını daşıyır.