BAKI, AzerVoice, Səməd Əyyubov – Braziliyanın bir neçə şəhərində minlərlə insan ABŞ Prezidenti Donald Trampın tətbiq etdiyi 50 faizlik gömrük rüsumlarına qarşı küçələrə axışaraq etiraz aksiyaları keçirib.
AzerVoice xəbər verir ki, aksiyalar əsasən paytaxt Brazilia şəhərində, eləcə də San-Paulu və Rio-de-Janeyroda baş tutub.
Etirazları Braziliya Milli Tələbə Birliyi (UNE) təşkil edib. Aksiya iştirakçıları ABŞ-ın Braziliyadakı səfirliyi və konsulluqları qarşısına yürüş edərək narazılıqlarını ifadə ediblər. Sosial hərəkat nümayəndələri və akademiklər də aksiyalara dəstək verib.
Etirazçılar “Tramp xalqın düşmənidir”, “Braziliya suveren dövlətdir” və “Nə ediləcəyinə yalnız braziliyalılar qərar verə bilər” kimi şüarlar səsləndiriblər. Onlar həmçinin Prezident Luis İnasio Lula da Silvadan ABŞ-a qarşı daha sərt mövqe tutmasını tələb ediblər.
Akademik Leonardo Sezar de Moura çıxışında ABŞ-ın gömrük rüsumlarını Braziliyanın daxili işlərinə müdaxilə adlandıraraq bildirib: “Bizə nə edəcəyimizi yalnız özümüz deyə bilərik. Başqa ölkələri idarə etməyə çalışan bir liderin Braziliya demokratiyasına nəzarət etmək hüququ yoxdur.”
Aksiyalar zamanı Donald Tramp və sabiq Braziliya prezidenti Jair Bolsonaronun kuklaları yandırılıb, ABŞ bayrağı isə oda verilib.
Xatırladaq ki, ABŞ administrasiyası Braziliyanın ABŞ-ın milli təhlükəsinə və iqtisadi maraqlarına təhdid yaratdığını əsas gətirərək bu ölkəyə tətbiq olunan gömrük rüsumlarını 10 faizdən 50 faizə yüksəltmişdi.
İyulun 31-də da Lula da Silva ABŞ-ın qərarına sərt reaksiya verərək Trampı açıq şəkildə tənqid etməkdən çəkinməyəcəyini bildirib.
Tramp iyulun əvvəlində Lula da Silvaya məktub göndərərək, sabiq prezident Bolsonaroya qarşı məhkəmə prosesləri dayandırılmadığı halda, avqustun 1-dən etibarən Braziliyaya qarşı 50 faizlik gömrük rüsumu tətbiq edəcəyini bildirmişdi.