BAKI, AzerVoice, Nailə Babazadə

İran Məhkəmə Tibb Ekspertizası Qurumunun rəhbəri Abbas Məscidi Arani ölkədəki etirazlar zamanı həyatını itirən etirazçıların əksəriyyətinin silahlı terrorçular tərəfindən hədəf alındığını açıqlayıb.

AzerVoice xəbər verir ki, İran dövlət televiziyasına danışan Arani ölənlərin mühüm hissəsinin kəsici alətlərlə həyati orqanlarından zərbə aldığını və ya yaxın məsafədən ov tüfəngləri ilə vurulduğunu iddia edib. O bildirib ki, etirazçıların arasına xüsusi silahlı təlim keçmiş qruplar sızıb və onlar qəsdən nümayişçiləri hədəf alaraq ölüm hallarına səbəb olublar. İran rəsmisi həm mülki şəxslərin, həm də təhlükəsizlik qüvvələrinin ölümünə görə məhz bu "terrorçu qüvvələrin" məsuliyyət daşıdığını vurğulayıb.

Xatırladaq ki, İranda etiraz aksiyaları 28 dekabr 2025-ci ildə yerli valyutanın kəskin dəyər itirməsi və iqtisadi problemlər səbəbindən Tehran Bazarında başlayıb. Aksiyalar qısa müddətdə ölkənin bir çox şəhərinə yayılıb. Rəsmi Tehran ölənlərin sayını 2 min nəfər olaraq qeyd etsə də, insan haqları təşkilatları fərqli rəqəmlər təqdim edir.

İran İnsan Haqları Aktivistləri Xəbər Agentliyinin (HRANA) yanvarın 13-nə olan hesabatına görə, hadisələrdə 133-ü təhlükəsizlik əməkdaşı olmaqla 664 nəfər həlak olub, 10 mindən çox insan isə saxlanılıb. Ölkədə şiddət hadisələrinin artması ilə əlaqədar yanvarın 9-dan etibarən internetə çıxış məhdudlaşdırılıb.