BAKI, AzerVoice
Aralarında Aralıq dənizi, Türkiyə, Avropa, ABŞ, Yaxın Şərq, Okeaniya və Asiyanın da olduğu dünyanın müxtəlif bölgələrində rekord həddə çatan istilər qeydə alınır. Gələcək günlərdə də havanın yüksək temperaturla davam edəcəyi proqnozlaşdırılır.
AzerVoice xəbər verir ki, hazırda Türkiyə də daxil olmaqla Aralıq dənizi və Avropanın bir sıra bölgələrində iyunun ilk yarısında təsirini göstərən şiddətli istilər yenidən özünü hiss etdirir.
Dünən Türkiyədə havanın temperaturu mövsüm normalarından 6-12 dərəcə yüksək olub. Ölkə üzrə ən yüksək temperatur isə 50,5 dərəcə ilə Şırnakın Silopi rayonunda qeydə alınıb.
Mardin Kızıltepedə 49,6, Cizredə 49,4, Nusaybində isə 49,3 dərəcə ölçülüb. Türkiyədə ümumilikdə 6 ölçü stansiyasında temperatur 49 dərəcəni keçib.
Yunanıstanın Mora yarımadasındakı Skala bölgəsində temperatur 46 dərəcəyə çatıb. Rodos adasındakı Lindos şəhərində isə 43,6 dərəcə ilə bölgənin ən yüksək temperaturu qeydə alınıb.
Albaniyanın cənub-qərbində yerləşən Avlonya şəhərində temperatur 42,4 dərəcə ilə rekord səviyyəyə çatıb, Sarayevoda isə 39 dərəcə olub.
Skandinaviya ölkələrindən Finlandiyanın Meteorologiya İnstitutu bildirib ki, bəzi bölgələrdə 14 gündür fasiləsiz olaraq 30 dərəcə istilər ölçülür. Bu isə 1961-ci ildən bəri ilk dəfədir.
İsveçdə də müxtəlif bölgələrdə gündüz temperaturu 30, gecə isə 23 dərəcəyə yüksəlib.
Cənub-Şərqi Asiyada, Taylandın Çavang bölgəsində 36,5, Filippinlərin Mindanao adasında yerləşən Surigao şəhərində isə 36,2 dərəcə istilər qeydə alınıb. İndoneziyanın Palu şəhərində temperatur 37 dərəcəyə yüksəlib, bu isti hava Malayziyada da hiss olunub.
Yaponiyanın şimalındakı Otaru bölgəsində 34 dərəcə, ölkənin digər bölgələrində isə 30 dərəcədən yuxarı istilər müşahidə olunub.
ABŞ-ın Milli Okean və Atmosfer İdarəsi (NOAA) yüksək təzyiqlə əlaqədar təhlükəli istilərin davam edəcəyi barədə xəbərdarlıq edib.
İraqın paytaxtı Bağdadda temperaturun bu gün 49 dərəcəyə çata biləcəyi bildirilir.
Misir, Oman, Yaxın Şərqin bir çox bölgəsi, eləcə də Türkiyə, Yunanıstan və Şərqi Aralıq dənizi bölgələrində istilərin həftə sonuna qədər yüksək səviyyədə davam edəcəyi proqnozlaşdırılır.