BAKI, AzerVoice

Qəzzada atəşkəs və məhbus mübadiləsi üzrə danışıqlar çərçivəsində fələstinli məhbusların azad edilməsi məsələsinin yaxın günlərdə müzakirəyə çıxarılacağı gözlənilir.

AzerVoice xəbər verir ki, İsrail və HƏMAS arasında Dohada davam edən danışıqlarda vasitəçilər – Qətər, Misir və ABŞ – tərəfindən fələstinli məhbusların azadlığı ilə bağlı konkret təklif təqdim olunub.

Məlumata görə, bu təklifə dair danışıqların başlanması HƏMAS-ın cavabından asılı olacaq.

İsrailin dövlət televiziyası KAN məsələni razılığa gəlmək üçün ən çətin mövzulardan biri kimi təqdim edib. Danışıqlarda tərəflər arasında əsas fikir ayrılığı İsrail ordusunun Qəzzadan çıxması və bufer zona ilə bağlıdır. İsrail yeni təklifində Moraq dəhlizi vasitəsilə ordunun Rəfah və Xan Yunisdən çəkilməsini, həmçinin sərhədyanı bufer zonasının müəyyən edilməsini irəli sürüb.

İsrailin Kanal 12 telekanalı isə bildirib ki, Təl-Əviv rəhbərliyi Misir sərhədindən şimala doğru 1,5 kilometrlik təhlükəsizlik zonası və Qəzza ətrafında 1 kilometrlik bufer zonası yaratmaq niyyətindədir. HƏMAS isə bu təklifləri dəyərləndirmək üçün vaxt istəyib və cavabını yaxın günlərdə təqdim edəcək.

Qeyd edək ki, ABŞ Prezidenti Donald Tramp İsrailin 60 günlük atəşkəs şərtlərini qəbul etdiyini açıqlayıb. Bu müddət ərzində 10 diri və 18 ölü israilli məhbusun azad edilməsi, eyni zamanda daimi atəşkəs üçün müzakirələrin aparılması planlaşdırılır. Tərəflər arasında əsas narazılıqlardan biri İsrailin Qəzza üzərində nəzarəti davam etdirmək və bəzi fələstinliləri digər ölkələrə deportasiya etmək planları ilə bağlıdır.